اسماعیل بقایي، د ایران د بهرنیو چارو وزارت ویاند، ویلي چې د هغه په اند د امریکا وړاندیز شوې حل لاره د اټومي بحران د مخنیوي لپاره، په عمل کې «اټومي برید» دی. هغه دا تګلاره د امریکا د سولې او اټومي بحران د مخنیوي ادعاوو سره په بشپړ تضاد کې بولي.
بقایی د جمعې په ورځ (د غویي ۱۸ مه) په ایکس ټولنیزې شبکې کې ولیکل چې دا سیاست د هغه په اند «ډېر بې مانا او مسخره» دی. هغه ټینګار کړی چې داسې څرګندونې د امریکا د سولې او ثبات له ادعاوو سره په ټکر کې دي.
دا څرګندونې د امریکا د ولسمشر ډونالډ ټرمپ وروستیو څرګندونو ته په غبرګون کې شوي دي. ټرمپ مخکې له دې خبریالانو ته ویلي و که چېرې له ایران سره د اوربند هڅه ناکامه شي، ښایي له ایران څخه «یوه لویه ځلا» وویني؛ هغه عبارت چې په رسنیو او سیاسي ډګر کې پراخ غبرګونونه را پارولي دي.
لیکواله:سلیمه آریایي
