درې عیني شاهدان وايي چې په هرات کې د طالبانو د امر بالمعروف او نهی عن المنکر محتسبینو په درېیو جلا پېښو کې څو ښځې او نجونې نیولې او له ځان سره یې بیولې دي. د یوه شاهد په وینا، په نیول شویو کسانو کې یوه ۱۳ کلنه نجلۍ هم وه چې سره له دې چې ځادر او ماسک یې اغوستی و، د طالبانو ځواکونو له خوا ونیول شوه.
یوه شاهد وویل چې د یکشنبې په ورځ شاوخوا د غرمې له ۱۱ بجو مخکې، د طالبانو د اطلاعاتو او کلتور ادارې ته څېرمه، د امر بالمعروف ځواکونو شاوخوا یوه ۱۳ کلنه نجلۍ هغه مهال ونیوله چې له یوه تعلیمي کورس څخه راوتلې وه. د هغه په وینا، نجلۍ د نیول کېدو پر مهال په لوړ غږ چیغې وهلې او له خلکو یې د مرستې غوښتنه کوله.
دغه شاهد زیاته کړه چې څو دوکاندارانو د پېښې له لیدلو وروسته د نجلۍ پر نیولو اعتراض وکړ او شعارونه یې ورکړل: «پر موږ دې شرم وي چې زموږ ناموس زموږ په مخ کې وړي او بندي کوي یې او موږ ورته ګورو.» د هغه په وینا، مامورینو یو اعتراض کوونکی په برقي ډنډه وهل ټکولی دی، چې له امله یې د دغه سړي مخ په وینو لړلی وو. وروسته نجلۍ، چې موټر ته انتقال شوې وه، له ځان سره یووړه.
بل عیني شاهد وویل چې په همدې ورځ، د طالبانو دوو موټرو د پل رنګینې په سیمه کې یو شمېر ښځې او نجونې ونیولې. د هغه په وینا، مامورینو څو ښځې او نجونې، چې د لمانځه ځادرونه او ماسکونه یې اغوستي وو، په زور موټر ته پورته کړي. د دغو ښځو له ډلې یوې یې دوه ماشومان هم له ځان سره لرل، او ماشومانو هغه مهال ژړل چې مور یې نیول کېده.
دغه شاهد زیاته کړه چې څو نارینه وو له طالب مامورینو وغوښتل چې ښځې خوشې کړي، خو طالب ځواکونو د هغوی غوښتنې ته پام ونه کړ او ښځې یې له ځان سره بوتلې. هغه وویل، کله چې موټرونه د صوفيآباد سیمې ته نږدې شول، دوو نقابلرونکو ښځو هم یوه ځوانه نجلۍ، چې ماسک او د لمانځه څادر یې اغوستي و، په زور موټر ته پورته کړه.
په درېیمه پېښه کې، یوه عیني شاهد د دوشنبې په ورځ وویل چې د طالبانو دوو موټرو یوه نجلۍ له هغې کوڅې څخه، چې د «حمام خواجه امیني» په نوم مشهوره ده، له ځان سره بوتله. د هغه په وینا، نجلۍ حجاب درلود، مانتو یې اغوستی و او پر مخ یې ماسک هم و.
دغه شاهد زیاته کړه چې نجلۍ یوه کڅوړه له ځان سره لرله او له ظاهري بڼې یې داسې ښکارېده چې عمر یې له ۲۰ کلونو کم وي. هغه د طالبانو د مامورینو له خوا د دغې نجلۍ سره چلند تاوتریخجن وباله او ویې ویل: «داسې وه لکه غل یې چې نیولی وي.»
په هرات کې د ښځو او نجونو د نیولو لړۍ د غبرګولي له ۱۶مې راهیسې زیاته شوې ده. د دغو نیونو په اړه خپرو شویو راپورونو د ښار د اوسېدونکو او د ښځو د حقونو د فعالانو غبرګونونه راپارولي دي.
د طالبانو د امر بالمعروف او نهی عن المنکر وزارت سرپرست، خالد حنفي، تر دې وړاندې ویلي وو هغه کسان نیول کېږي چې د ده په وینا د «بېحجابۍ د ترویج، د ګډوډۍ رامنځته کولو او د دې وزارت پر ضد د منفي مطالبو د خپرولو» هڅه کوي.
لیکواله:سلیمه آریایي
