د افغانستان پخواني لوی څارنوال، محمد فرید حمیدي، د هغو خپرو شویو ویډیوګانو په اړه اندېښنه څرګنده کړې چې په کې له مړو شوو کسانو او جنګي اسیرانو سره د طالبانو د ځواکونو د چلند په اړه ادعاوې شوي دي. نوموړي دغه کړنې د انساني کرامت، اسلامي اصولو او نړیوالو قوانینو خلاف بللي دي.
حمیدي د جمعې په ورځ، د زمري په ۳۰مه، په اېکس ټولنیزه شبکه کې په یوه اعلامیه کې ویلي چې د مړو سپکاوی او د وژل شویو کسانو بېحرمتي «د ناپوهۍ اوج، د اخلاقو سقوط او بشري جنایت» دی او په هېڅ حالت کې باید د انساني او اخلاقي اصولو له مخې توجیه نه شي.
د افغانستان پخواني لوی څارنوال ټینګار کړی چې انساني کرامت یوه الهي ډالۍ ده او له نژاد، دین، ژبې، قومیت او ملیت پرته د ټولو انسانانو لپاره یو شان دی. د نوموړي په وینا، دغه کرامت باید حتی له مرګ وروسته هم خوندي وساتل شي.
هغه په ټولنیزو شبکو کې د بدخشان، بادغیس او سالنګ سیمې څخه د خپرو شویو ویډیوګانو په اړه ویلي چې د دغو انځورونو له مخې، په ځینو مواردو کې د طالبانو ځواکونو له مړو شوو کسانو سره سپکوونکی او توهینآمیزه چلند کړی دی.
حمیدي دغه ډول چلند د اسلامي اصولو او ارزښتونو سرغړونه او همدارنګه د نړیوال بشردوستانه حقوقو، په ځانګړي ډول د جینوا کنوانسیونونو اړوندو مقرراتو، خلاف بللی او د وسلهوالو نښتو پر مهال یې د مړو شوو کسانو د حرمت پر ساتلو ټینګار کړی دی.
هغه ویلي: «جګړه هم اخلاق، اصول او قوانین لري.» نوموړي زیاته کړې چې د دغو اقداماتو مسوولیت یوازې پر هغو کسانو نه راځي چې په مستقیم ډول یې ترسره کوي، بلکې هغه امر کوونکي او چارواکي چې د دغو کړنو پر وړاندې چوپ پاتې شوي هم ښايي قانوني او اخلاقي مسوولیت ولري.
دا څرګندونې په داسې حال کې کېږي چې په وروستیو ورځو کې په ټولنیزو شبکو کې داسې ویډیوګانې خپرې او بیا خپرې شوې دي چې ادعا کېږي د طالبانو ځواکونه له مړو شوو کسانو سره نامناسب او توهینآمیز چلند کوي. د دغو ویډیوګانو د وخت، ځای او ځینو جزئیاتو په اړه تر اوسه خپلواک او د باور وړ تایید شوي معلومات نه دي موجود.
لیکواله:سلیمه آریایي
