د لوږې پر وړاندې د مبارزې سازمان وایي، په هلمند ولایت کې د خوارځواکۍ د درملنې مرکزونه نور د نویو ناروغانو د منلو وړتیا نه لري.
د دغه سازمان مشر، کوبي ریتولډ، هلمند ته له سفر وروسته ویلي چې په لشکرګاه کې د ۴۵ ماشومانو لپاره جوړ شوی د خوارځواکۍ د درملنې مرکز د اړتیا له امله ۷۰ بسترونو ته پراخ شوی، خو دغه نوی ظرفیت هم په یوازې څو ساعتونو کې بشپړ شوی دی.
د نوموړي په وینا، بېوزلي، بېځایه کېدل، اقلیمي بدلون او د بشري مرستو د بودیجې کمښت په افغانستان کې د لوږې او خوارځواکۍ بحران لا پسې ژور کړی دی.
د لوږې پر وړاندې د مبارزې سازمان له نړیوالو مرسته کوونکو غوښتي چې د افغانستان د تغذیې او بشري مرستو د پروګرامونو د دوام لپاره بېړنۍ مالي مرستې برابرې کړي، څو د خوارځواکۍ له زیاتېدونکي بحران سره د مبارزې هڅې ونه درېږي.
لیکوال:سعید سمیر
