د امر بالمعروف او نهی عن المنکر وزارت ویاند سیفالاسلام خیبر د ښځو پر پوښښ لګول شویو محدودیتونو په اړه د نیوکو په غبرګون کې ویلي چې په نړۍ کې هېڅ هېواد مطلقه ازادي نه لري او ټول حکومتونه د خپلو وګړو لپاره قانوني محدودیتونه وضع کوي.
هغه په اېکس ټولنیزه شبکه کې په یوه لیکنه کې ټینګار کړی چې څنګه دولتونه خپل وګړي د مالیاتو ورکولو او د ترافیکي قوانینو د رعایت کولو مکلفوي، همداسې یو اسلامي حکومت هم حق لري چې خپلې ټولنیزې او اخلاقي تګلارې عملي کړي.
خیبر زیاته کړې چې اسلامي هېوادونه کولای شي خپل ټولنیز نظام د دیني ارزښتونو پر بنسټ تنظیم کړي، لکه څنګه چې لوېدیځ هېوادونه خپل قوانین د خپلو فکري او سیاسي لیدلورو له مخې جوړوي.
هغه د طالبانو د سختو اقداماتو په اړه نیوکې احساساتي بللې او ویلي یې دي چې د مأمورینو احتمالي سرغړونې باید اسلام ته ونه منسوبېږي.
د امر بالمعروف وزارت ویاند زیاته کړې چې ټولنه یوازې په نصیحت نه اداره کېږي، بلکې د قانون پلي کول هم د ټولنیز مدیریت یوه اړینه برخه ده، که څه هم بلنه او ارشاد د دین له مهمو اصولو څخه ګڼل کېږي.
هغه هغو منتقدینو ته چې د اجبار پر ځای پر پوهاوي ټینګار کوي، پوښتنه کړې چې ولې په نورو هېوادونو کې د الزامي قوانینو پلي کول اجبار نه بلل کېږي، خو په اسلامي نظام کې د قوانینو پلي کول د اجبار په نوم تر نیوکو لاندې راځي.
دا څرګندونې داسې مهال مطرح کېږي چې راپورونه په هرات کې د حجاب د نه رعایت له امله د ښځو د نیولو او له ځینو اعتراض کوونکو سره د تاوتریخوالي د چلند خبر ورکوي.
د راپورونو له مخې، په هرات کې د وروستیو اعتراضونو پر مهال طالب ځواکونو د لاریون کوونکو د خورولو لپاره ډزې کړې دي، چې له امله یې لږ تر لږه دوه کسان، د یوه ماشوم په ګډون، وژل شوي او څو نور ټپیان شوي دي.
لیکواله:سلیمه آریایي
