ذبیحالله مجاهد په خصوصي پوهنتونونو کې د حقوقو او سیاسي علومو څانګو د تړل کېدو پخلی وکړ.
د طالبانو ویاند ذبیحالله مجاهد په کابل کې یوې خبري غونډې ته د وینا پر مهال، په خصوصي پوهنتونونو کې د ځینو څانګو، د حقوقو او سیاسي علومو په ګډون، د تړل کېدو موضوع په ضمني توګه تایید کړه.
مجاهد، یکشنبې، د وږي په ۸مه، د حکومت د رسنیو په مرکز کې د خبریالانو د پوښتنو په ځواب کې وویل، هغه برخې چې خصوصي پوهنتونونه پکې «کمزوري» دي، ښايي وتړل شي.
هغه زیاته کړه چې د حقوقو او سیاسي علومو څانګې په دولتي پوهنتونونو کې لا هم فعالې دي او ټاکل شوې چې لا زیاتې پاملرنې او پیاوړتیا ته اړتیا ورکړل شي. د نوموړي په وینا، یاده طرحه به دولتي پوهنتونونه نه رانغاړي.
د طالبانو ویاند وویل: «البته کېدای شي ځینې خصوصي پوهنتونونه چې په هغه برخه کې کمزوري وي او یا تدریس پکې کمزوری وي، [د تړلو طرحه] هماغو ته شامله شي. دولتي پوهنتونونه پکې شامل نه دي، بلکې برعکس، په دولتي پوهنتونونو کې لا زیاته پاملرنه روانه ده.»
د مجاهد دغه څرګندونې وروسته له هغې مطرح کېږي چې تېره اوونۍ په ټولنیزو رسنیو کې د طالبانو د لوړو زدهکړو وزارت د رهبرۍ د کمېټې د یوې غونډې د صورتجلسې انځور خپور شو. په دغه سند کې د خصوصي پوهنتونونو د حقوقو، سیاسي علومو او نړیوالو اړیکو د پوهنځیو د تړلو پرېکړې یادونه شوې وه.
د یادې صورتجلسې له مخې، د طالبانو د لوړو زدهکړو وزارت د رهبرۍ غړو پرېکړه کړې چې په دغو څانګو کې خصوصي زدهکړې هم ودرول شي. خو طالب چارواکو تر دې وړاندې د دې پرېکړې په اړه رسمي او بشپړ وضاحت نه و ورکړی.
طالبانو په تېرو پنځو کلونو کې د افغانستان په پوهنتونونو کې پر یو شمېر تحصیلي څانګو محدودیتونه لګولي دي. ځینې څانګې، د هنر او موسیقۍ د برخو په ګډون، هم په دې موده کې د هېواد د پوهنتونونو له تعلیمي نصاب څخه حذف شوي دي.
لیکواله:سلیمه آریایي
