د ایران ولسمشر مسعود پزشکیان د عاشورا د ماتم په مراسمو کې او د حسینی ویر کوونکو په منځ کې وویل چې متحده ایالات او اسرائیل فکر کاوه چې د ایران حکومت به په درې ورځو کې له منځه ولاړ شي، خو د هغه په وینا دا هدف عملي نه شو.
پزشکیان په خپلو خبرو کې وویل چې د ایران پوځ او د اسلامي انقلاب سپاه پاسداران د ترسره شوو بریدونو پر وړاندې اغېزمنه مبارزه کړې او توانېدلي دي چې مقاومت وکړي.
د ایران ولسمشر همدارنګه د عاشورا د پېښې په یادولو سره وویل: «هغه څوک چې د حسین لاره تعقیبوي، د دښمنانو د بمونو او توغندیو پر وړاندې سر نه ټیټوي او هېڅکله به یې ټیټ نه کړي.»
دا څرګندونې په داسې حال کې شوي چې ایران او مقابل لوري یې د روانې اونۍ په پیل کې په سویس کې د خپلو خبرو لومړی پړاو ترسره کړی دی.
په ورته وخت کې، د ایران د بهرنیو چارو وزیر عباس عراقچي د دې خبرو پایلې د خپل هېواد لپاره مثبتې ارزولي او ویلي یې دي چې مذاکراتو ایران ته د پام وړ لاسته راوړنې لرلي دي.
لیکواله:سلیمه آریایي
