د غزني ولایت د جغتو ولسوالۍ د شاکي کلي اوسېدونکو، وروسته له هغې چې د جمهوري نظام پر مهال، د طالبانو د حکومت او مرستندویه ادارو په دوره کې یې پرلهپسې غوښتنې بې ځوابه پاتې شوې، د خپلو شخصي لګښتونو په وسیله د دې کلي د ماشومانو لپاره یو ښوونځی جوړ کړ.
یوې سیمهییزې سرچینې اکسیوس ته ویلي چې د «شاکي لېسې» ودانۍ په درېیو کلونو کې، په بشپړه توګه د خلکو په شخصي بودیجه جوړه شوې ده. د سرچینې په وینا، د دې ښوونځي د پرانیستې مراسم د دوشنبې په ورځ، د چنګاښ په ۲۲مه، د زدهکوونکو، ښوونکو، د سیمې د اوسېدونکو او د غزني د طالبانو د پوهنې ریاست د یوه پلاوي په حضور کې ترسره شول.
د ورکړل شویو معلوماتو له مخې، د دې ښوونځي د جوړولو لګښت له ۷ میلیونه او ۵۰۰ زره افغانیو څخه زیات شوی، چې ټول لګښت یې د سیمې د اوسېدونکو او په بهر کې د مېشتو یو شمېر خیرخواهانو له خوا برابر شوی دی.
د ښوونځي ودانۍ په ۷۰۰ متره مربع ځمکه کې جوړه شوې او ۸ درسي خونې او ۴ اداري خونې لري. دا ښوونځی د نږدې ۵۰۰ زدهکوونکو د منلو ظرفیت لري.
ټاکل شوې ده چې په دې ښوونځي کې هلکان زدهکوونکي تر دولسم ټولګي او نجونې تر شپږم ټولګي پورې خپلو زدهکړو ته دوام ورکړي.
د شاکي لېسې آمر محمد داوود کمالي ویلي چې د دې ودانۍ له جوړېدو مخکې زدهکوونکو د دوبي په ګرمو ورځو کې د لمر لاندې او د ژمي په سړو موسمونو کې د باد، باران او یخنۍ پر وړاندې، په خلاصه فضا یا زړو خیمو کې درسونه ویل.
د ودانۍ له بشپړېدو سره سره، د ښوونځي مسوولین وايي چې لا هم د لابراتوار، برېښنا، کمپیوټر او کتابتون په څېر اسانتیاوو ته اړتیا لري. د غزني د پوهنې رئیس نصیراحمد حسیني، چې د ښوونځي د پرانیستې په مراسمو کې یې ګډون کړی و، د تجهیزاتو په اړه کومه ژمنه ونه کړه.
هغه همداراز ویلي چې د غزني ولایت له ۶۷۵ دولتي ښوونځیو څخه ۲۵۰ یې لا هم معیاري ودانۍ نه لري.
یوه ولسي سرچینه وايي چې د شاکي کلي اوسېدونکو او د دې ښوونځي مسوولینو د پخواني حکومت پر مهال او همداراز د طالبانو د واکمنۍ په لومړیو کلونو کې څو ځله له دولتي ادارو او بهرنیو موسسو څخه د ښوونځي د ودانۍ جوړولو غوښتنه کړې وه، خو دغه غوښتنې بې پایلې پاتې شوي.
د سرچینې په وینا، په پای کې د سیمې اوسېدونکو د خپلو ماشومانو لپاره د مناسب ښوونیز چاپېریال د برابرولو په موخه، په خپلو امکاناتو او شخصي پانګې د ښوونځي د جوړولو کار پیل کړ او بشپړ یې کړ.
تر دې وړاندې هم د غزني ولایت د جغتو، ناور، مالستان او جاغوري ولسوالیو اوسېدونکو یو شمېر عامالمنفعه پروژې، لکه ښوونځي، روغتونونه، د اوبو بندونه، سړکونه، پلونه او پلچکونه، په شخصي لګښت پلي کړي دي او ځینې یې لا هم د پلي کېدو په حال کې دي.
لیکواله:سلیمه آریایي
