د جمهوري نظام لومړي مرستیال امرالله صالح پر خپلې اېکسپاڼې د افغانستان د روان بحران په تړاو د مطرح کېدونکو دیپلوماټیکو او سیاسي بیانونو په غبرګون کې ویلي، چې د طالبانو او پاکستان په خبرو پټې سترګې باور کول د تحلیل لاره غلطوي.
امرالله صالح لیکلي، کله چې پاکستان د افغانستان د وضعیت په اړه څه وایي، په کار ده چې په درېیو خپلواکو سرچینو یې وپلټئ او بیا هم په پوره توګه شکمن پاتې شئ.
د هغه په وینا، کله چې طالبان کومه رسمي اعلامیه خپروي، باید په لومړي سر کې د یو بشپړ درواغ په توګه چلند ورسره وشي او بیا هڅه وشي ترڅو وپلټل شي چې ایا نیمایي برخه یې رښتیا ده که نه.
نوموړي زیاته کړې، د افغانستان د روانو پېښو په ارزونه کې دا ډول سخت او پر شک ولاړ چلند به د هېواد د بحران په تړاو سیاسي شنونکو او تحلیلګرانو ته لا ډېره روښانتیا او د فکر صفایي ور په برخه کړي.
لیکوال:سعید سمیر
