په غور ولایت کې ځايي سرچینې خبر ورکوي چې د تېورې ولسوالۍ شاوخوا ۷۰ تنه قومي مشران او سپینږیري نادرکه شوي دي. د سرچینو په وینا، دغه کسان د طالبانو له چارواکو سره د لیدنې لپاره د ولایت مرکز ته تر سفر وروسته تر اوسه له خپلو کورنیو سره اړیکه نه ده نیولې او د هغوی د وضعیت او د ساتلو د ځای په اړه هم هېڅ معلومات نشته.
د ترلاسه شویو معلوماتو له مخې، دغه قومي مشران دوه ورځې وړاندې د غور د طالبانو والي حیاتالله مهاجر په بلنه د تېورې ولسوالۍ د زربید کلي څخه د فیروزکوه ښار ته تللي وو. ویل کېږي چې د دې لیدنې موخه په سیمه کې د وروستیو پېښو او کړکېچونو په اړه خبرې اترې وې.
ځايي سرچینې وایي چې د دې پلاوي له رسېدو وروسته د غور ولایت مرکز ته، د هغوی ټولې اړیکې له کورنیو او د سیمې له اوسېدونکو سره پرې شوي دي. د سرچینو په خبره، تر اوسه د دغو کسانو د وضعیت او یا هم د هغوی د اوسېدو د ځای په اړه هېڅ رسمي معلومات نه دي خپاره شوي.
دې وضعیت د تېورې ولسوالۍ د اوسېدونکو او د یادو کسانو د کورنیو ترمنځ پراخې اندېښنې راپارولې دي. یو شمېر اوسېدونکي ادعا کوي چې طالبانو دغه کسان نیولي او نامعلوم ځای ته یې لېږدولي دي؛ خو دا ادعا تر اوسه د طالبانو له لوري نه تأیید شوې او نه هم رد شوې ده.
د دغو کسانو کورنیو د خپلو خپلوانو د برخلیک د ژر تر ژره روښانېدو او له کورنیو سره د هغوی د اړیکو د ټینګېدو غوښتنه کړې ده. هغوی همداراز له مسؤلو ادارو او اړوندو مراجعو غوښتي چې د دغو قومي مشرانو د وضعیت په اړه روڼتیا رامنځته کړي.
دا پېښه داسې مهال رامنځته کېږي چې په تېرو څو کلونو کې د افغانستان له بېلابېلو سیمو څخه د طالبانو د منتقدینو او مخالفینو د نیولو، زنداني کولو او ځپلو ګڼ راپورونه خپاره شوي دي؛ هغه موضوع چې څو ځله یې د بشري حقونو د بنسټونو او مدني فعالانو اندېښنې راپارولې دي.
لیکواله:سلیمه آریایي
