د پنجشیر ولایت ځايي سرچینې وایي چې طالبانو شاوخوا یوه اوونۍ وړاندې د دې ولایت یو اوسېدونکی، چې څو میاشتې مخکې له ایرانه افغانستان ته راستون شوی و، د ملي مقاومت جبهې سره د همکارۍ په تور نیولی دی.
سرچینو د چهارشنبې په ورځ، د چنګاښ ۱۷مه، وویل چې طالبانو په وروستیو میاشتو کې له ایرانه تر ستنېدو وروسته د پنجشېر یو شمېر اوسېدونکي هم نیولي دي. دا ادعا تر اوسه د خپلواکو سرچینو له خوا نه ده تأیید شوې.
د سرچینو د معلوماتو له مخې، نیول شوی کس عبدالقهار، د محمداسحاق زوی، او د پنجشیر ولایت د آبشار ولسوالۍ د سنګيخان کلي اوسېدونکی دی.
د سرچینو په وینا، عبدالقهار د افغانستان د جمهوري نظام له سقوط وروسته ایران ته کډه شوی و او شاوخوا څلور کاله یې هلته کارګري کړې ده. نوموړی نږدې څلور میاشتې مخکې له ایرانه ایستل شوی او افغانستان ته بېرته راستون شوی و.
سرچینې وایي چې اوس د عبدالقهار له نیول کېدو شاوخوا یوه اوونۍ تېرېږي، خو کورنۍ یې تر اوسه د هغه د ساتلو له ځای او وضعیت څخه هېڅ معلومات نه لري.
طالبانو تر اوسه د ځايي سرچینو د دغو ادعاوو او د نیول شوي کس د برخلیک په اړه څه نه دي ویلي.
په وروستیو کلونو کې د بشري حقونو بنسټونو او رسنیو هم داسې راپورونه خپاره کړي چې پکې د طالبانو له بیا واکمنېدو وروسته د پنجشېر د یو شمېر اوسېدونکو د نیولو، شکنجې او د هغوی د حقونو د سرغړونو ادعاوې شوي دي. طالبانو دغه تورونه رد کړي او ټینګار یې کړی چې د دوی د ځواکونو اقدامات د امنیت د تأمین او د قانون د پلي کولو په چوکاټ کې ترسره کېږي.
لیکواله:سلیمه آریایي
