د بشري حقونو د فعالانو اتحاد، د طالبانو د جنګیالیو له خوا د دوو سپینږیرو کسانو د سخت وهلو ټکولو ویډیو تر خپرېدو وروسته ویلي، چې دغه انځورونه یو ځل بیا د دې ډلې د تاوتریخوالي ریښهدار او سیسټماتیک ماهیت څرګندوي.
دغه بنسټ د دوشنبې په ورځ، د غویي ۲۸مه، په یوه اعلامیه کې ویلي چې پر ملکي وګړو د وسلوالو کسانو له خوا د «لرګي، سوک او لغتو» بریدونه د داسې تاوتریخوالي ښکارندويي کوي چې له اخلاقي، قانوني او انساني پولو اوښتی دی.
د اعلامیې له مخې، موجود راپورونه او شواهد ښيي چې دغه پېښه ښايي د ځمکې له غصب، جبري بېځایه کولو، یا د ملکي وګړو پر ضد د وېرې او ډار فضا رامنځته کولو سره تړاو ولري.
د بشري حقونو د فعالانو اتحاد ټینګار کړی چې دا ډول کړنې تر دې وړاندې هم د طالبانو له خوا تکرار شوي دي او د انساني کرامت، د وګړو د اساسي حقونو او د بشري حقونو د نړیوالو اصولو ښکاره نقض ګڼل کېږي.
په اعلامیه کې زیاته شوې چې د طالبانو د تاوتریخوالي او ځپنې تاریخي بڼه اوس له ټولو محدودیتونو اوښتې او ښايي پراخې ټولنیزې او امنیتي پایلې ولري.
دغه بنسټ خبرداری ورکړی چې د دې ډول کړنو دوام به ټولنیز ټپونه لا ژور کړي او په راتلونکي کې به د لا ډېرې بېثباتۍ زمینه برابره کړي.
دا په داسې حال کې ده چې تر دې وړاندې هم په ټولنیزو شبکو کې د طالبانو د ځواکونو له خوا د ښځو او سړیو د وهلو ټکولو او شکنجې ویډیوګانې خپرې شوي وي. په وروستیو مواردو کې، داسې ویډیوګانې خپرې شوي چې ښيي په کابل کې یو ځوان هلک او یوه ښځه د طالبانو له خوا وهل شوي دي.
لیکواله:سلیمه آریایي
