د طالبانو د مخابراتو او معلوماتي ټکنالوژۍ وزارت ویاند عنایتالله الکوزي ویلي، هغه راپورونه چې ګواکې د انټرنېټ د محدودولو یا بندولو په اړه پرېکړې شوې دي، بېبنسټه دي.
نوموړي ټینګار کړی چې د دغه وزارت نوی وزیر، ملا عبدالاحد فضلي، له هېڅ مخابراتي شرکت سره د انټرنېټ د بندېدو یا محدودېدو په اړه رسمي خبرې نه دي کړې. د هغه په وینا، ټولې وروستۍ رسمي څرګندونې یوازې د مخابراتو وزارت له رسمي دریځه خپرې شوې دي.
دا څرګندونې په داسې حال کې کېږي چې څو ورځې وړاندې په کابل کې د نوري فایبر انټرنېټي شرکتونو ځینو مسوولانو رسنیو ته ویلي وو چې د مخابراتو نوي وزیر د اترا ادارې ته لارښوونه کړې چې پر عامو خلکو د نوري فایبر وایفای خدمتونه بند کړي.
همداراز د افغان ټلیکام او ځینو نورو انټرنېټي خدماتو شرکتونو سرچینو ادعا کړې وه چې د همدې لارښوونې پر بنسټ په کابل کې د نوري فایبر د لاینونو غځول تر نامعلومې مودې پورې ځنډول شوي دي. د دوی په وینا، افغان ټلیکام اړوندو شرکتونو ته په دې اړه رسمي برېښنالیک هم استولی و.
لیکوال:سعید سمیر
