د کندهار د عامه ګټو ریاست مسوولین وايي چې په دې ولایت کې اوس مهال ۳۶ عامه پروژې د ۱۲ میلیارد افغانیو په ارزښت روانې دي. له دې جملې څخه، ۲۴ پروژې د عامه ګټو ریاست په څارنه او ۱۲ نورې پروژې د طالبانو د ادارې د رهبري دفتر لخوا پرمخ وړل کيږي.
عزیزالرحمن شریف وایي چې دې پروژو کې د کندهار–سپینبولدک د ریل پټلۍ جوړول، د لویو لارو بیا رغونه او د پلونو او پلچکونو جوړول په جنوب کې شامل دي.
ځینې موټر چلوونکي وایي چې د لویو لارو ترمیم به تګ راتګ آسانه کړي او د سفر وخت به کم کړي.
خو تر اوسه پورې د دې پروژو د تمویل سرچینو او د بودیجې د مصرف پر څارنې جزئیات نه دي ورکړل شوي؛ چې دا موضوع، د څارونکو په وینا، د طالبانو ادارې لخوا زیاته روڼتیا ته اړتیا لري.
لیکواله:سلیمه آریایي
