د طالبانو د مخابراتو او معلوماتي ټکنالوژۍ وزارت وايي، د ډیورنډ کرښې ته څېرمه په ۱۳ سرحدي ولسوالیو کې د مخابراتي پوښښ د پراختیا لپاره یې له افغان بیسیم مخابراتي شرکت سره د څه باندې ۲۶۹ میلیونه افغانیو په ارزښت تړون لاسلیک کړی دی.
د دغه وزارت ویاند عنایتالله الکوزي ویلي، چې د تړون له مخې به د هلمند، کندهار، پکتیکا او زابل په ۱۳ سرحدي ولسوالیو کې مخابراتي ستنې جوړې او مخابراتي خدمات وړاندې شي.
د طالبانو د مخابراتو وزارت ادعا کړې چې د ډیورنډ کرښې په اوږدو کې پرتې دغو ولسوالیو کې اوسېدونکي تر دې وړاندې هېڅ ډول مخابراتي خدماتو ته لاسرسی نه درلود.
د طالبانو حکومت تر دې مخکې هم ویلي وو چې د ډیورنډ کرښې په اوږدو کې د سرحدي ولسوالیو د خدماتو د پراختیا لپاره د دوی مشر هبتالله اخوندزاده بودجه ځانګړې کړې، څو په دغو سیمو کې د بیارغونې او نورو خدماتو زمینه برابره شي.
لیکوال:سعید سمیر
