ځایي سرچینې په بدخشان ولایت کې وایي چې د سرو زرو پر کانونو د شکي ولسوالۍ په سیمه کې کړکېچونه او نښتې لا هم روانې دي. د دغو سرچینو په خبره، اسماعیل غزنوي، د طالبانو والی په بدخشان کې، د دغو کړکېچونو د حل لپاره شکی ولسوالۍ ته تللی، خو تر اوسه له دې سفره کومه نتیجه نه ده ترلاسه شوې.
سرچینې وایي چې سیمهییز اوسېدونکي ادعا کوي چې د طالبانو یو شمېر کسان د هغوی ځمکې چې د سرو زرو کانونه لري، نیولې دي. د شکي ولسوالۍ اوسېدونکو ټینګار کړی چې تر هغه وخته پورې چې د هغوی ځمکې بېرته نه وي ورکړل شوې او د کانونو تجهیزات له دې سیمو څخه بهر شوي نه وي، دوی به له کړکېچونو لاس وا نه اخلي.
سرچینو مخکې ویلي وو چې په شکي ولسوالۍ کې د سیمهییزو اوسېدونکو او د طالبانو ځواکونو ترمنځ د سرو زرو پر کانونو د نښتو په ترڅ کې تر اوسه ۲ تنه وژل شوي او ۱۰ نور ټپیان شوي دي.
هم مهاله، ځایي سرچینې وایي چې د بدخشان ولایت د جرم ولسوالۍ په ځینو سیمو کې هم وسلهوالې پېښې روانې دي. د سرچینو په وینا، لږ تر لږه ۳ تنه ټپیان شوي او ۳ نور نیول شوي دي.
سرچینې زیاتوي چې د آزادیۍ جبهې له اعلان وروسته چې په جرم ولسوالۍ کې د خپلو ځواکونو د ځای پر ځای کېدو خبر یې ورکړی و، طالبانو خپل تفتیشونه په ځینو برخو کې زیات کړي دي. همدارنګه ویل کېږي چې د طالبانو ځواکونه د خستک دره او نږدې سیمو ته مېشت شوي دي.
سرچینې وایي چې د آزادۍ جبهې ځواکونه هم د توپخانې په سیمه کې په لوړ پوړو ځایونو او د افغانستان او پاکستان ترمنځ په صفري سیمه کې ځای پر ځای شوي دي. تر اوسه پورې طالبانو په دې اړه څه نه دي ویلي.
دا په داسې حال کې ده چې د تېرو دوو اونیو په اوږدو کې د ځایي اوسېدونکو او طالب ځواکونو ترمنځ نښتې او کړکېچونه په څو ولسوالیو کې روان دي. دا کړکېچونه عمدتاً د کوکنارو د کښت، د سرو زرو پر کانونو او همدارنګه د طالبانو مخالفو ډلو د فعالیتونو په اړه راپور شوي دي.
سرچینې وایي چې دا نښتې د ارګو، شکي، خاش او جرم ولسوالیو کې له تېرو څو ورځو راهیسې شدت موندلی دی. د سرچینو د معلوماتو پر اساس:
په ارګو ولسوالۍ کې ۲ تنه وژل شوي او ۸ نور ټپیان شوي،په شکي ولسوالۍ کې ۲ تنه وژل شوي او ۱۰ نور ټپیان شوي،په خاش ولسوالۍ کې ۱۱ تنه ټپیان شوي،او په جرم ولسوالۍ کې ۳ تنه ټپیان شوي او ۳ نور نیول شوي دي.
لیکواله:سلیمه آریایي
