د طالبانو د صنعت او سوداګرۍ وزارت ویلي چې د دغه وزارت سرپرست شهابالدین ثاقب د چین د ارومچي ښار د سفر پر مهال له مېشتو افغان سوداګرو سره لیدلي او د هغوی د سوداګریزو ستونزو او ننګونو په اړه یې خبرې کړي دي.
د وزارت په وینا، ثاقب د یوه رسمي پلاوي په مشرۍ د چین–اوراسیا ۲۰۲۶ نندارتون کې د ګډون لپاره چین ته تللی دی. په دې لیدنه کې افغان سوداګرو خپلې ستونزې او غوښتنې له نوموړي سره شریکې کړې او د سوداګریزو اړیکو د پراختیا په اړه هم خبرې شوي دي.
د طالبانو د سوداګرۍ وزارت ویلي، د دغه سفر موخه د افغانستان او چین ترمنځ د سوداګرۍ، پانګونې او اقتصادي همکاریو پراخول او د افغان سوداګرو لپاره د اسانتیاوو رامنځته کول دي.
لیکوال:سعید سمیر
