انعام الله وزیر، د خیبر پښتونخوا د پولیسو یوه چارواکي، اعلان کړی چې د لوی اختر له رخصتیو وروسته د تورخم دروازه یو ځل بیا د افغان کډوالو او هغو کورنیو پر مخ پرانیستل شوې چې افغانستان ته ستنېږي.
د لنډي کوتل د پولیسو مرستیال د شنبې په ورځ، د غبرګولي په نهمه، وویل چې د افغان کډوالو لېږدوونکي موټر او همدارنګه هغه تش موټر چې له افغانستانه پاکستان ته بېرته راګرځي، خپل عادي تګ راتګ بیا پیل کړی دی. د هغه په وینا، د افغان کډوالو د بېرته ستنولو بهیر د اړوندو ادارو تر څارنې لاندې په منظم ډول روان دی.
دغه پاکستاني چارواکي زیاته کړه چې د تورخم دروازه د لوی اختر د رخصتیو له امله د غبرګولي له پنځمې تر اتمې نېټې پورې د بېرته ستنېدونکو کډوالو پر مخ تړل شوې وه، خو اوس یې فعالیتونه بیا پیل شوي دي.
د تورخم دروازې بیا پرانیستل په داسې حال کې کېږي چې دغه لار د طالبانو او پاکستان ترمنځ د سرحدي کړکېچونو او نښتو له امله د سوداګرۍ او ترانزیټ په برخه کې د څو میاشتو لپاره له پراخو محدودیتونو سره مخ وه. سره له دې، شاوخوا درې میاشتې وړاندې دغه دروازه له پاکستان څخه د افغان کډوالو د بېرته ستنولو لپاره بېرته فعاله شوې وه.
په همدې حال کې، یو شمېر افغان کډوال د بېرته ستنېدو د اداري بهیر له اوږدې مودې او د لنډي کوتل په کمپ کې د اسانتیاوو له کمښت څخه شکایت کوي او د کډوالو لپاره د خدمتونو او اسانتیاوو د ښه کېدو غوښتنه لري.
پاکستان په وروستیو میاشتو کې د افغان کډوالو د نیولو او ایستلو بهیر چټک کړی، او زرګونه افغان کډوال له دغه هېواده افغانستان ته ستانه کړل شوي دي.
نویسنده:سلیمه آریایي
