د متحده عربي اماراتو د دفاع وزارت د جمعې په سهار، د غویي ۱۸ مه، اعلان وکړ چې د دغه هېواد د هوايي دفاع سیسټمونو له ایران سره تړاو لرونکو توغندیو او بې پيلوټه الوتکو د بریدونو پر وړاندې مبارزې په حال کې دي.
دغه وزارت ټینګار وکړ چې هغه د چاودنو غږونه چې په څو سیمو کې اورېدل شوي، د لارموندنې عملیاتو له امله دي او هېڅ یو بریدګر هدف د متحده عربي اماراتو خاورې ته نه دی رسېدلی.
دا پېښه یوه ورځ وروسته له هغې رامنځته شوه چې د هرمز تنګي شاوخوا د امریکایي او ایراني ځواکونو تر منځ محدوده نښته شوې وه. د هرمز تنګی د نړۍ د انرژۍ د لېږد یو له مهمو لارو څخه ګڼل کېږي او شاوخوا ۲۰٪ تېل او مایع ګاز له دې لارې تېریږي.
د امریکا ولسمشر ډونالډ ټرمپ د پنجشنبې په ورځ اعلان وکړ چې درې امریکایي تخریب کونکي کښتۍ په هرمز تنگي کې د برید هدف ګرځېدلي پر مهال، خو هېڅ زیان نده ورته اوښتی. هغه وویل چې امریکایي ځواکونو د بریدګرو پر ضد غبرګون ښودلی دی. ټرمپ دغه نښته «کم اهمیته» وبلله او ټینګار یې وکړ چې اوربند لا هم دوام لري.
له بلې خوا، د ایران د وسلوالو ځواکونو قومندانۍ اعلان وکړ چې امریکایي ځواکونو اوربند مات کړی دی. ایراني چارواکو ادعا وکړه چې امریکایي ځواکونو یوه ایرانی تېل وړونکې او یوه بله کښتۍ هدف ګرځولي او پر سمندري سیمو او قشم په جزیره یې بریدونه کړي دي.
د خاتمالانبیا قومندانۍ ویاند هم وویل چې د دغو بریدونو په غبرګون کې امریکایي پوځي کښتۍ هدف ګرځول شوي او د پام وړ زیان ورته رسېدلی دی.
د امریکا مرکزي قومندانۍ (سنټکام) دغه ادعاوې رد کړې او ټینګار یې وکړ چې هېڅ امریکایي تجهیزات او شتمنۍ زیان نه دی لیدلی. سنټکام همدارنګه وویل چې امریکایي ځواکونو یوازې د ایران د «بېتحریکه» بریدونو په ځواب کې، ځینې پوځي تاسیسات د ایران د سمندري سیمو، په شمول د قشم او بندر عباس شاوخوا سیمې، هدف ګرځولي دي.
د دواړو خواوو تر منځ له دې میاشتې د اوربند له پیل راهیسې څو ځلې محدودې نښتې شوې دي. د متحده عربي اماراتو د وروستیو بریدونو په پایله کې د فجیره د تېلو صنعتي سیمه کې محدوده اورلګېدنه او څو سپکې ژوبلې رامنځته شوي دي.
خو تر اوسه هېڅ مستقلې او معتبرې سرچینې، په شمول د سپوږمکۍ انځورونه یا د نړیوالو رسنیو راپورونو، د پراخو انساني تلفاتو یا شدیدو زیانونو تایید نه دی کړی.
اوس مهال په سیمه کې تناوونه لا هم لوړ ارزول کيږي او د اوربند د ساتلو او پیاوړي کولو لپاره ډیپلوماټیکې هڅې روانې دي.
لیکواله:سلیمه آریایي
