په سرپل ولایت کې ځايي سرچینو د دغه ولایت د سوزمهقلعه ولسوالۍ کې د یوې ۱۱ کلنې نجلۍ د وژل کېدو خبر ورکړی دی. د دغو سرچینو په وینا، دا پېښه د قزاق په کلي کې رامنځته شوې او قرباني نجلۍ په خپل کور کې د چاقو په وسیله د برید هدف ګرځېدلې ده.
د سرچینو د معلوماتو له مخې، دغې ماشومه نجلۍ د چاقو د ګوزارونو له امله خپل ژوند له لاسه ورکړی دی. همداراز ویل کېږي چې د پېښې پر مهال د هغې د کورنۍ غړي په کور کې موجود وو، خو تر اوسه د پېښې د څرنګوالي، احتمالي انګېزې یا د عاملانو د هویت په اړه نور جزییات نه دي خپاره شوي.
ځايي سرچینې وایي چې د دې پېښې په اړه لومړنۍ څېړنې روانې دي. خو تر اوسه د دې پېښې په تړاو هېڅوک نه دي پېژندل شوي او نه هم نیول شوي دي، او رسمي ادارو هم په دې اړه نور معلومات نه دي ورکړي.
د سیمې یو شمېر اوسېدونکو د قضیې د هر اړخیزې څېړنې، د عاملانو د پېژندلو او د قرباني کورنۍ ته د عدالت د برابرولو غوښتنه کړې ده. هغوی له مسؤلینو غوښتي چې د دې پېښې د څېړنې بهیر په روڼتیا سره تعقیب کړي.
دا پېښه په داسې حال کې رامنځته شوې چې په افغانستان کې د ښځو او ماشومانو پر وړاندې د تاوتریخوالي راپورونه لا هم د خلکو او د بشري حقونو د مدافع بنسټونو اندېښنې راپاروي. تر اوسه په سرپل ولایت کې د طالبانو ځايي چارواکو د دې پېښې په اړه کوم رسمي غبرګون یا څرګندونه نه ده کړې.
لیکواله:سلیمه آریایي
