د کابل ښار د شهرنو په یوه رستورانت کې دوه وروڼه د چړې په برید وژل شوي دي.
د باوري سرچینو په وینا، دغه پېښه د پنجشنبې په ورځ د زمري په ۱۵مه رامنځته شوې ده. وژل شوي وروڼه فرشید او جمشید حقبین نومېدل، ۲۰ او ۲۲ کاله عمرونه یې لرل او د هرات ولایت د انجیل ولسوالۍ د غیبتان کلي اوسېدونکي وو.
سرچینې وایي، د پېښې له مخکینۍ شپې د دواړو وروڼو او د رستورانت د یوه کارګر ترمنځ د کاري موضوعاتو، په ځانګړي ډول پخلنځي ته د کارکوونکو د ننوتلو پر سر لفظي شخړه شوې وه، خو هماغه شپه پای ته رسېدلې وه.
د معلوماتو له مخې، سبا سهار یاد کارګر د پخلنځي له چړې سره د دواړو وروڼو د خوب ځای ته ورغی، لومړی یې پر یوه ورور برید وکړ او دویم ورور چې د تېښتې هڅه یې کوله، هغه هم په چړې وواهه. دواړه د سختو ټپونو له امله مړه شول.
سرچینې زیاتوي، د برید په تور نیول شوی کس د طالبانو د امنیتي ځواکونو تر څېړنو لاندې دی.
لیکوال:سعید سمیر
