متحدې جبهې، چې مشري یې جنرال سمېع سادات کوي، ادعا کړې چې د چهارشنبې په شپه یې د بغلان ولایت د اندراب ولسوالۍ د دهصلاح په «اولاد» سیمه کې د طالبانو پر یوې پوستې برید کړی او له نښتې وروسته یې پوسته نیولې ده.
د جبهې په وینا، د برید پر مهال یې د طالبانو یو شمېر وسلې او تجهیزات هم له ځان سره وړي دي.
ځايي سرچینو هم ویلي چې برید د شپې شاوخوا ۱۰:۲۰ بجې د ولسوالۍ له مرکز څخه نږدې دوه کیلومتره لرې ترسره شوی، چې ورپسې د دواړو لورو ترمنځ نښته شوې او د ډزو او چاودنو غږونه اورېدل کېدل.
طالبانو تر اوسه د دې ادعا په اړه څه نه دي ویلي. بلخوا، محلي سرچینې وايي چې د پېښې له تعقیب وروسته طالبانو د دهصلاح ولسوالۍ د څو کلیو د اوسېدونکو کورونه تلاشي کړي دي.
لیکوال:سعید سمیر
