سویلي کوریا له یوې بېسارې تودوخې څپې سره مخ شوې؛ هغه پېښه چې تر دې دمه یې لږ تر لږه د ۱۶ کسانو ژوند اخیستی او څه باندې دوه زره کسان یې روغتیايي مرکزونو ته رسولي دي.
د یونهاپ خبري اژانس د راپور له مخې، د مې له ۱۵مې نېټې راهیسې، ۲ زره او ۲۵ کسان د ګرمۍ له امله د پیدا شویو ناروغیو له کبله تر درملنې لاندې نیول شوي دي. په ورته وخت کې، حکومت بیړنی روغتیايي حالت اعلان کړی او د لومړي ځل لپاره یې د سیول ښار په کچه د ګرمۍ د سختې څپې جدي خبرداری خپور کړی.
تر ټولو لوړه ثبته شوې تودوخه د سوېل ختیځ ښار یانګسان کې ۴۲.۵ درجې سانتي ګراد ته رسېدلې ده؛ دا په دغه هېواد کې په ۱۹۰۴ کال کې د هوا پېژندنې د ارقامو له پیل راهیسې تر ټولو لوړه کچه ده. د دائګو او ګوریونګ ښارونو کې هم د هوا تودوخه له ۴۰ درجو او په سیول کې له ۳۸ درجو اوښتې ده.
کارپوهان په ټوله نړۍ کې د ګرمۍ د څپو زیاتوالی تر ډېره د اقلیمي بدلونونو له امله ګڼي. په ورته وخت کې، بېلابېل هېوادونه هم په روان اوړي کې له سختې ګرمۍ، پراخو اورلګېدنو او د ګرمۍ له امله د مړینو له زیاتوالي سره مخ شوي دي.
لیکواله:سلیمه آریایي
