د عزیزي ګروپ مالک مرویس عزیزي وایي، چین ته د خپل کاري سفر پر مهال یې د افغانستان او چینايي شرکتونو ترمنځ د انرژۍ د همکارۍ د پراخولو لپاره رسمي لیدنې پیل کړي دي. د نوموړي په وینا، د دغو خبرو اصلي موخه د بغلان ولایت لپاره د ډبروسکرو پر مټ د برېښناکوټونو د جوړولو پروژه ده.
عزیزي ویلي، د سفر په لومړۍ ورځ یې د چین د شاندونګ ولایت په جینان ښار کې د «رن پاور» شرکت له مشرانو سره لیدلي او د برېښنايي پروژو د انجینرۍ، طرحې او جوړولو په اړه یې خبرې کړي دي. هغه زیاتوي چې د «عزیزي انرژۍ» او «رن پاور» ترمنځ د همکارۍ هوکړه به ژر وروستۍ شي.
د نوموړي په وینا، دا پروژه د افغانستان د لس زره مېګاواټه برېښنا د تولید د ستر پروګرام برخه ده، چې له مخې به یې یوازې په بغلان ولایت کې زر مېګاواټه برېښنا تولید شي.
مرویس عزیزي همدارنګه ویلي، د دوی پلاوی به په راتلونکو ورځو کې د چین له نورو شرکتونو سره هم وګوري او د ډبروسکرو، لمریزې او بادي انرژۍ په برخه کې به د پانګونې او ګډې همکارۍ فرصتونه وارزوي.
دا په داسې حال کې ده چې عزیزي ګروپ تېر کال له طالبانو سره د لس میلیارده ډالرو په ارزښت د لس زره مېګاواټه برېښنا د تولید تړون لاسلیک کړی و، خو تر اوسه د دې پروژې عملي پرمختګ محدود بلل کېږي.
لیکواله:سعید سمیر
