د پاکستاني رسنیو د راپورونو له مخې، د خیبر پښتونخوا ایالت د باجوړ په ولسوالۍ کې د یوې چاودنې په پایله کې لږ تر لږه د یوې کورنۍ درې غړي وژل شوي او ۱۰ نور ټپیان شوي دي. د پولیسو په وینا، داسې اټکل کېږي چې یو مشکوک ډرون ممکن په مومند تحصیل، د باجوړ په سیمه کې پر یوه استوګنیز کور چاودېدونکي توکي غورځولي وي.
د پاکستان د «ډان» ورځپاڼې راپور ورکړی چې دا پېښه د چهارشنبې په ماښام، د چنګاښ ۱۰مه نېټه، د باجوړ ولسوالۍ د داما دولای سیمې ته نږدې رامنځته شوې ده. د دې پېښې قربانیان د یوې کورنۍ غړي دي چې په هغوی کې یوه ۵ کلنه نجلۍ او یو ۱۵ کلن هلک هم شامل دي.
د پولیسو د سرچینو په وینا، د وژل شویو کسانو مړي او ټپیان روغتون ته لېږدول شوي دي. همدارنګه د پېښې د شواهدو د راټولولو او د پېښې د اړخونو د څېړلو لپاره یو څېړنیز ټیم سیمې ته استول شوی دی.
تر اوسه پورې هېڅ شخص یا ډلې د دې برید مسوولیت نه دی منلی. له دې سره سره، پولیس ټول احتمالي سناریوګانې څېړي او د عامل یا عاملانو د پېژندلو لپاره تحقیقات روان دي.
د مومند سیمې د پولیسو مرستیال سیدالرحمان د دې پېښې د تلفاتو پخلی کړی او ویلي یې دي چې رسمي څېړنې پیل شوي دي او امنیتي ځواکونه هڅه کوي د دې برید سرچینه معلومه کړي.
په وروستیو اونیو کې د باجوړ په ولسوالۍ کې د ډرون له لارې څو مشکوک بریدونه راپور شوي دي. د یکشنبې په ورځ هم په ورته یوه برید کې یو ماشوم او یوه ښځه وژل شوي وه. د خیبر پښتونخوا چارواکو مخکې ویلي وو چې دا مشکوک ډرونونه له نامعلومو ځایونو څخه کنټرولېږي.
لیکواله:سلیمه آریایي
