د امریکا جګړې وزیر پیټ هېګسېت اعلان کړی چې د ټېکنالوژۍ میلیاردر ایلان ماسک به یو ځل بیا په رسمي ډول د ولسمشر ډونالډ ټرمپ له حکومت سره د سلاکار په توګه کار وکړي. هغه به د پنټاګون د «میردین پروژې» مشري د دفاعي ټکنالوژۍ شرکت «اندوریل» له بنسټګر پالمر لاکي او د امریکا د استازو جرګې له پخواني رییس نیوټ ګینګرېچ سره په ګډه کوي.
هېګسېت دغه پروژه د راتلونکو جګړو د بڼې، احتمالي جګړهییزو ډګرونو او هغو پرمختللو وسلو او ټکنالوژیو د ارزونې لپاره معرفي کړې چې د امریکا پوځ به په راتلونکو لسیزو کې ورته اړتیا ولري.
د امریکا د دفاع وزارت په وینا، د «میردین پروژې» تمرکز یوازې پر اوسنیو جګړو نه دی، بلکې د مصنوعي ځیرکتیا، خپلواکو وسلو، روبوټونو، بېپیلوټه الوتکو، فضايي ټکنالوژۍ او نورو پرمختللو نظامي وړتیاوو پر راتلونکي هم اغېز کوي. پروژه به د ځمکې له لاندې سیمو څخه تر سپوږمۍ هاخوا فضايي چاپېریال پورې د راتلونکو جګړهییزو ډګرونو امکانات هم وڅېړي.
د پنټاګون د معلوماتو له مخې، د دې پروژې مشري به د دفاع وزارت د ټکنالوژۍ مشر ایمیل مایکل همغږي کوي او ټاکل شوې چې د ۱۲۰ ورځو په موده کې خپل کار بشپړ کړي. په پای کې به یوه عامه راپور او ورسره محرم ضمیمه وړاندې شي.
ماسک تر دې وړاندې هم د ټرمپ له حکومت سره رسمي رول درلود او د حکومت د موثریت د ادارې (DOGE) له لارې یې د فدرالي حکومت د لګښتونو او ادارو د کمولو په برخه کې فعالیت کاوه، خو وروسته یې له ټرمپ سره عامه اختلافات پیدا شول. اوس د «میردین پروژې» له لارې د هغه بیا رسمي رول ته ستنېدل د امریکا د دفاعي ټکنالوژۍ په پالیسۍ کې د خصوصي ټېکنالوژۍ شرکتونو د ونډې د زیاتېدو څرګندونه کوي.
د پام وړ ده چې ماسک او پالمر لاکي دواړه هغه شرکتونه لري چې د امریکا له دفاع وزارت سره قراردادونه لري؛ له همدې امله ځینو راپورونو د پروژې په اړه د احتمالي ګټو د ټکر پوښتنې هم مطرح کړې دي.
لیکوال:سعید سمیر
