سره له دې چې د جرمي مخینې لرونکو کډوالو افغانستان ته بېرته استولو په اړه نیوکې شوي، د آلمان د کورنیو چارو وزیر ویلي چې دا پالیسي به «په قاطعانه توګه» دوام ولري. د هغه په وینا، مجرم کډوال د آلمان لپاره د امنیتي ګواښ په توګه ګڼل کېږي. الکساندر دوبرینټ زیاته کړه چې آلمان په دې برخه کې د طالبانو له چارواکو سره په اړیکه کې دی.
هغه د یکشنبې په ماښام د «اې آر ډي» ټلویزیوني شبکې ته د نیوکو په ځواب کې وویل، هغه کسان چې د مجرمینو د بېرته استولو مخالفت کوي، باید تشریح کړي چې که دا کسان په آلمان کې پاتې شي، ایا آلمان به «خوندي» وي که نه؟
د خپرو شوو معلوماتو له مخې، په تېر یوه کال کې لږ تر لږه ۱۳۸ افغان کډوال له آلمان څخه افغانستان ته استول شوي دي.
راپورونه ښيي چې د آلمان حکومت له طالبانو سره یوې هوکړې ته رسېدلی چې د منظم بېرته استولو زمینه برابروي. په بل لوري کې، طالبانو ته اجازه ورکړل شوې چې دوه ډیپلوماټان آلمان ته واستوي.
لیکواله:سلیمه حکیمي
