روسي امنيتي ځواکونو یو سړی د لاسي بم د جوړولو د هڅې او د دغه هېواد د عدلیې وزارت په ودانۍ کې د چاودنې د پلان جوړولو په تور نیولی دی. قضايي چارواکو د دغه کس هویت ویټالي لارین اعلان کړی دی. د محکمې د پرېکړې له مخې، نوموړی به د ۲۰۲۶ کال د جولای تر ۲۹مې پورې په موقتي توقیف کې وساتل شي، څو د دې قضیې د څېړنو بهیر بشپړ شي.
د روسي رسنیو د راپورونو له مخې، ویټالي لارین د مې میاشتې په ۲۸مه نېټه په مسکو ښار کې ونیول شو. هغه تر دې وړاندې هم د عدلیې وزارت په ودانۍ کې د اوکراین پلوي تبلیغاتي بروشورونو لرونکي بکس د لېږدولو له امله په ۱۵ ورځني اداري بند محکوم شوی و. لارین هغه مهال ویلي وو چې دغه بکس یې په تصادفي ډول موندلی و.
روسي چارواکو تر اوسه د نوموړي د احتمالي انګېزې یا په دې قضیه کې د نورو کسانو د ښکېلتیا په اړه نور جزئیات نه دي خپاره کړي. په دې اړه څېړنې لا هم روانې دي او اړوندو ادارو د نورو معلوماتو له ورکولو ډډه کړې ده.
په وروستیو میاشتو کې، د روسیې امنیتي ادارو د اوکراین د جګړې اړوند فعالیتونو څارنه د پام وړ زیاته کړې ده. دا اقدامات د هغو پراخو امنیتي تدابیرو یوه برخه ده چې د دواړو هېوادونو ترمنځ د جګړې له پیل وروسته د روسي چارواکو له خوا عملي کېږي.
په یوه جلا پېښه کې، د روسیې د لوېدیځې دویمې سیمې پوځي محکمې د اورلوف سیمې درې اوسېدونکي د هېواد پر ضد د خیانت او له اوکرایني اړیکهنیوونکو سره د یوه ترهګریز برید د چمتو کولو په تور مجرم پېژندلي. د محکمې د حکم له مخې، دغو کسانو ته د اوږدمهاله بند سزاوې ورکړل شوې دي.
لیکواله:سلیمه آریایي
