د تخار ولایت د کوکچې هاخوا ولسوالیو اوسېدونکي وايي چې دا ارتباطي لار د تېرو کلونو په ترڅ کې د ناامنۍ او جګړو له امله د بیا رغونې او قیر اچونې له بهیر څخه پاتې شوې ده، او سره له دې چې د طالبانو له خوا څو ځلې ژمنې شوي دي، د دې سړک ځینې برخې لا هم نیمګړې پاتې دي.
دغو اوسېدونکو د چهارشنبې په ورځ، د چنګاښ په ۳مه، له «اکسوس» سره په خبرو کې ویلي چې د ۲۰۲۱ کال له سیاسي بدلون وروسته د دې لویې لارې د ناتمامو پروژو کارونه ودرول شول او تر اوسه پورې یې د بیا پیل لپاره هېڅ عملي اقدام نه دی شوی.
د دوی په وینا، د خلکو پرلهپسې غوښتنو هم تر اوسه کومه مثبته پایله نه ده ورکړې او اړوند چارواکو په دې برخه کې مشخص اقدام نه دی کړی.
د سیمې اوسېدونکي ټینګار کوي چې دا لویه لار د کوکچې هاخوا په ولسوالیو کې یو مهم ارتباطي مسیر بلل کېږي، خو له کلونو تېرېدو سره سره لا هم په خراب وضعیت کې پاتې ده او هېڅ بدلون پکې نه دی راغلی.
د دغو ولسوالیو اوسېدونکي وايي چې د سړک خرابوالي د خلکو د تګ راتګ په برخه کې جدي ستونزې جوړې کړي، د ترانسپورټ لګښتونه یې لوړ کړي او د ناروغانو انتقال یې روغتیايي مرکزونو ته له سختو ستونزو سره مخ کړی دی.
د دوی په وینا، په ځینو مواردو کې ناروغان د خراب سړک او د انتقال د ځنډ له امله تر روغتون رسېدو مخکې له جدي خطرونو سره مخ شوي دي.
په همدې حال کې، ځینې سیمهییزې سرچینې وايي چې د پروژې د ځنډ موضوع له اړوندو مسؤلینو سره شریکه شوې ده، خو تر اوسه د دې لویې لارې د کار د بیا پیل لپاره کوم عملي تصمیم نه دی نیول شوی.
د سیمې اوسېدونکي ټینګار کوي چې د دې لارې بیا رغونه او بشپړول باید د انکشافي پروګرامونو په لومړیتوب کې وي، ځکه چې د اوسني وضعیت دوام نه یوازې د تګ راتګ ستونزې زیاتې کړي، بلکې پر خلکو اقتصادي او ټولنیز فشارونه هم ډېر کړي دي.
لیکواله:سلیمه آریایي
