د سرپرست حکومت د عامه ګټو وزارت اعلان کړی چې د سالنګ لویه لار به د چنګاښ له ۱۹مې نېټې څخه د اساسي بیارغونې پروژې د پلي کېدو په موخه، تر بلې خبرتیا پورې د ټېلري موټرو پر مخ وتړل شي. دا اقدام د بیارغونې چارو د چټک پرمختګ او د دې مهمې ترانزیټي لارې د وضعیت د ښه والي لپاره ترسره کېږي.
یاد وزارت له موټرچلوونکو او له بار وړونکو شرکتونو څخه غوښتي چې د دې محدودیت له پیل مخکې خپل بارونه د شمال او جنوب په دواړو لوریو کې ولېږدوي او له هغې وروسته د سالنګ پر لویه لار د ټېلري موټرو له تګ راتګ څخه ډډه وکړي. تر اوسه د بیا رغونې د چارو د پای ته رسېدو او د لارې د بشپړې بېرته پرانیستې لپاره کومه مشخصه نېټه نه ده اعلان شوې.
د سالنګ لویه لار د افغانستان له مهمو ترانزیټي لارو څخه ده چې د هېواد شمال او جنوب سره نښلوي. د سوداګریزو توکو، خامو موادو او د بازار د اړتیا وړ ګڼ شمېر توکي له همدې لارې لېږدول کېږي، او دا لار د مالونو په لېږد او د اقتصادي فعالیتونو په پیاوړتیا کې مهم رول لري.
اقتصادي کارپوهان وایي چې د دې لارې تړل، که څه هم موقتي وي، د لېږد رالېږد لګښتونه زیاتولای شي او د توکو د انتقال بهیر له ځنډ سره مخ کولای شي. د هغوی په باور، دا وضعیت به د اکمالاتي ځنځیر، د ترانزیټ لګښتونو، په کورنیو بازارونو کې د ځینو توکو پر بیو، د بار وړونکو شرکتونو پر فعالیتونو او همدارنګه د افغانستان د شمالي او مرکزي ولایتونو ترمنځ د سوداګرۍ پر بهیر اغېز وکړي.
لیکواله:سلیمه آریایي
