د «نړۍ د ۱۰ نوو ټکنالوژیو» کلنی راپور د ۲۰۲۶ کال لپاره خپور شو؛ دا راپور د مهمو علمي او ټکنالوژیکو نوښتونو یوه ټولګه معرفي کوي چې په راتلونکو کلونو کې د انسان د ژوند د بدلون تر ټولو زیات ظرفیت لري. دا راپور د نړیوالو ساینس پوهانو او متخصصینو په همکارۍ جوړ شوی او هغه ټکنالوژۍ پکې شاملې دي چې د ازموینې له مرحلې تېرې شوي او د ورځني ژوند د پراخې کارونې په درشل کې دي.
د راپور له مخې، د ۲۰۲۶ کال لس غوره ټکنالوژۍ په لاندې ډول معرفي شوې دي:
د مصنوعي ځیرکتیا په وسیله د درملو کشف؛ داسې ټکنالوژي چې د روغتیایي او بیولوژیکي معلوماتو د پراخ تحلیل له لارې د نوو درملو د جوړولو بهیر چټک او دقیق کوي او د پیچلو ناروغیو په درملنه کې مهم رول لرلی شي.
جامد حالت بیټرۍ؛ د بیټرۍ نوی نسل چې له اوسنیو بیټریو څخه خوندي، اوږدمهاله او ډېر اغېزمن دي او د برقي موټرو او د انرژۍ د زېرمه کولو په برخه کې لوی بدلون راوستلی شي.
د هستهیي همجوشۍ انرژي؛ پاکه او نږدې بېپایه انرژي چې که تجارتي بڼه ومومي، کولای شي د فوسیل سون توکي بدل کړي او د نړۍ د انرژۍ راتلونکی بدل کړي.
د جنیټیک اصلاح ټکنالوژي؛ یوه پرمختللې طریقه چې د جینونو دقیق بدلون ممکن کوي او د ارثي ناروغیو د درملنې او ځینو اختلالاتو د اصلاح زمینه برابروي.
په لابراتوار کې تولید شوې غوښه؛ داسې ټکنالوژي چې د څارویو د حجرو په کنټرول شویو شرایطو کې د غوښې تولید کوي او د دودیزې مالدارۍ چاپېریالي اغېزې کموي.
له هوا څخه د کاربن جذب او ذخیره کول؛ یوه طریقه چې د شنو خونو ګازونه کموي او د اقلیمي بدلون پر ضد د کاربن دای اکساید د له منځه وړلو له لارې مرسته کوي.
د مغز او کمپیوټر ترمنځ اړیکه؛ داسې ټکنالوژي چې د انسان مغز او ډیجیټلي وسایلو ترمنځ مستقیمه اړیکه ممکن کوي او د معلولیتونو په درملنه او د اړیکو په پراختیا کې مرسته کولی شي.
کوانټومي کمپیوټنګ؛ د محاسبو نوی نسل چې د کوانټم فزیک پر اصولو ولاړ دی او ډېر پېچلي مسائل په لنډ وخت کې حل کولی شي.
پرمختللي خودمختار روباټونه؛ داسې روباټونه چې مستقل تصمیم نیولی شي او په صنعت، ټرانسپورټ او خدماتو کې پراخ رول لري.
مصنوعي بایوټکنالوژي؛ یوه نوې څانګه چې د انجینري شوي بیولوژیکي سیستمونو یا موجوداتو د جوړولو امکان برابروي او په طب، انرژۍ او چاپېریال کې کارېدلی شي.
په پای کې په راپور کې ټینګار شوی چې د دغو ټکنالوژیو د انتخاب معیارونه نوښت، بازار ته د داخلېدو چمتووالی او پر انساني ژوند د اغېز کچه وه، او ډېری یې اوس د تجارتي کېدو په درشل کې دي چې په راتلونکو کلونو کې به نړۍ کې پراخ بدلونونه رامنځته کړي.
لیکواله:سلیمه آریایي
