د افغانستان د سوداګرۍ او پانګونې خونې اعلان کړی چې د ازبکستان نمنګان ولایت ته د طالبانو د چارواکو او افغان سوداګرو له ۱۰۰ کسیز پلاوي د سفر پر مهال، د ۲۱۰ میلیونه ډالرو په ارزښت د سوداګرۍ او پانګونې تفاهملیکونه لاسلیک شوي دي.
د وړاندې شویو معلوماتو له مخې، دغه تفاهملیکونه د افغانستان او ازبکستان ترمنځ د سوداګریزو او پانګونې همکاریو بېلابېلې برخې رانغاړي؛ خو تر اوسه د پروژو د جزئیاتو او د همکاریو د ډول په اړه نور معلومات نه دي خپاره شوي.
ازبکستان، چې د افغانستان له شمالي ګاونډیو هېوادونو څخه دی، په وروستیو کلونو کې یې له کابل سره خپلې سوداګریزې اړیکې ساتلې دي او د دواړو لورو ترمنځ د اقتصادي همکاریو د پراختیا هڅې دوام لري.
د خصوصي سکتور فعالان وایي چې د سیمهییزو همکاریو پراختیا کولای شي د بازارونو په ښه والي، د راکړې ورکړې په زیاتوالي او د افغانستان د خلکو لپاره د کاري فرصتونو په رامنځته کولو کې مهم رول ولوبوي؛ هغه موضوع چې د هېواد د سختو اقتصادي شرایطو په نظر کې نیولو سره ځانګړی اهمیت لري.
لیکواله:سلیمه آریایي
