سرچینو رسنیو ته ویلي چې د ایران اسلامي جمهوریت چارواکي د هغو افغانانو پاسپورټونه چې د علي خامنهاي، د اسلامي جمهوریت د پخواني رهبر، د جنازې په مراسمو کې د ګډون لپاره بلل شوي، د اسلامکلا او دوغارون له پولو د داخلېدو پر مهال په موقتي ډول اخلي او د هغوی د افغانستان ته له ستنېدو وروسته یې بېرته ورته سپاري. د سرچینو په وینا، د دې اقدام هدف دا دی چې د بلل شویو کسانو د بېرته ستنېدو ډاډ ترلاسه شي.
د معلوماتو له مخې، ایران ۲۵۰۰ افغان وګړو ته د دې مراسمو د ګډون لپاره ویزې صادرې کړي دي. دا کسان به له افغانستان څخه مشهد ته ولاړ شي او د علي خامنهای د جنازې او درناوي په پروګرامونو کې به ګډون وکړي.
سرچینې وايي چې د ایران د بېلابېلو ادارو مامورین د اسلامکلا او دوغارون د ایران لوري په برخه کې ځای پر ځای شوي دي. د هغوی په وینا، د پاسپورټونو تر ترلاسه کولو وروسته، هر ګډونوال ته ځانګړی کارت ورکول کېږي چې یوازې په مشهد کې د حضور لپاره اعتبار لري.
د سرچینو په وینا، دا کارتونه به د سفر تر پایه د پاسپورټ پر ځای کارول کېږي او د مراسمو له پای ته رسېدو او د ګډونوالو له ستنېدو وروسته به د هغوی پاسپورټونه بېرته ورکړل شي.
ایراني چارواکو اعلان کړی چې افغان مېلمانه به د چنګاښ په ۱۴ او ۱۵ نېټه د دوغارون له رسمي پولې څخه ایران ته ننوځي. د صادرو شوو ویزو اعتبار اووه ورځې دی او دا کسان باید د مراسمو له پای ته رسېدو وروسته د چنګاښ په ۲۰مه او ۲۱مه نېټه له همدې پولې افغانستان ته ستانه شي.
د ایراني چارواکو د اعلامیې له مخې، د دوغارون په پوله کې د مېلمنو منل د چنګاښ په ۱۴مه او ۱۵مه نېټه د سهار له ۸ بجو تر ماښام ۵ بجو پورې ترسره کېږي. همدارنګه ویل شوي چې د دې کسانو معلومات به له ایران څخه تر وتلو پورې په اړوندو سیستمونو کې ثبت، څېړل او تعقیب کېږي.
د خراسان رضوي سیمهییزو چارواکو هم ویلي چې په مشهد ښار کې د افغان مېلمنو د منلو، استوګنې او مېلمستیا لپاره ۱۲ مرکزونه ځانګړي شوي دي. د هغوی په وینا، دا مرکزونه د ۲۵۰۰ څخه زیاتو کسانو د مېلمستیا وړتیا لري.
د تایباد ولسوال ویلي چې له دوغارون پولې څخه مشهد ته د مېلمنو د لېږد لپاره بسونه او کرایي موټرونه چمتو شوي او ټول اجرایي، خدماتي او امدادي ادارې په پوله کې په چمتووالي حالت کې دي.
تر دې مخکې د خراسان رضوي چارواکو ویلي وو چې امکان لري تر ۴۰۰۰ پورې افغان وګړي د مشهد په مراسمو کې ګډون وکړي او د ۲۵۰۰ کسانو لپاره وړیا ویزې صادرې شوي دي.
د راپورونو له مخې، په بلل شویو کسانو کې یو شمېر دیني عالمان، مخور کسان، سوداګر او فرهنګي او سیاسي څېرې، په ځانګړي ډول له کابل او هرات څخه، شامل دي.
د ایران اسلامي جمهوریت له خوا د اعلان شوي رسمي پروګرام له مخې، د علي خامنهاي مړی به د چنګاښ په ۱۲ نېټه د تهران د امام خمیني مصلا ته ولېږدول شي او بهرني پلاوي به د درناوي لپاره هلته حاضر وي. همدارنګه د خدای پامانۍ مراسم د چنګاښ په ۱۳مه او ۱۴مه نېټه، په تهران کې د جنازې مراسم د چنګاښ په ۱۵مه نېټه، د مړي لېږد قم ته د چنګاښ په ۱۶مه نېټه او د جنازې او خاور ته سپارلو مراسم په مشهد کې د چنګاښ په ۱۸مه نېټه ترسره کېږي.
اسلامي جمهوریت همدارنګه د طالبانو چارواکو او د دې ډلې د مخالفو جریانونو له یو شمېر مشرانو ته په دې مراسمو کې د ګډون لپاره بلنه ورکړې ده. عبدالغني برادر، د طالبانو د ریاستالوزرا اقتصادي مرستیال، امیرخان متقي، د طالبانو د بهرنیو چارو وزیر، احمد مسعود، د ملي مقاومت جبهې مشر، او محمد محقق، د افغانستان د خلکو د اسلامي وحدت ګوند مشر، له هغو څېرو څخه دي چې د دې مراسمو لپاره تهران ته سفر کړی دی.
لیکواله:سلیمه آریایي
