لیکواله:سلیمه آریایي
سهشنبې،د غویي ۸ مه، د مجاهدینو د بریالیتوب ۳۴مې کلیزې سره سمون خوري، چې په مقابل کې یې د ډاکټر نجیبالله حکومت له منځه یووړ. دا حکومت د مجاهدینو لخوا د پخواني شوروي ملاتړ شوی ګڼل کېده. دغه ورځ د افغانستان په سیاسي تقویم کې د تېرو لسګونو کلونو له مهمو پېښو څخه ګڼل کېږي.
۳۴ کاله وړاندې، د ۱۳۷۱ کال د غویي په ۸مه، بېلابېلو مجاهدینو ډلو د ډېرو کلونو جګړو او نښتو وروسته کابل ته ننوتل او د ډاکټر نجیبالله حکومت، چې د شوروي اتحادیې لخوا ملاتړ کېده، سقوط وکړ. دغه پېښه د هېواد په قدرتي جوړښت کې د بشپړ بدلون لامل شوه.
طالبانو د غويي ۷ مې او ۸ مې په مناسبت یوه بیانیه خپره کړې ده چې دغه ورځ یې «تاریخي او ویاړلې ورځ» بللې او د غویي د۷مې پېښه او پایلې یې غندلې دي. په دغه بیانیه کې ویل شوي چې غویي ۸مه باید د بریالیتوب او کامیابۍ ورځې په توګه شکرګذاري شي.
سره له دې، یو شمېر افغانان او سیاسي پوهان باور لري چې د مجاهدینو د بریالیتوب وروسته هېواد د کورنیو جګړو دورې ته داخله شو چې په پایله کې یې زرګونو کسانو ته مرګ ژوبله واوښته او په هېواد کې د کډوالۍ یوه لړۍ پیل شوه. د ځینو له قوله، دغه اختلافات او نښتې د راتلونکو لسیزو لپاره د پراخې بېثباتۍ بنسټ کېښود.
یو شمېر شنونکي هم وایي چې د ۷۰مو کلونو د کورنیو جګړو، نه یوازې د بشري مرګونو او پراخې کډوالۍ لامل شول، بلکې داسې شرایط یې برابر کړل چې بالاخره طالبانو د لومړۍ ځل لپاره واک ته ورسېدل او د هېواد سیاسي لاره یې په بنسټیز ډول بدله کړه.
