ځايي سرچينې وايي چې شاوخوا ۴۰ کلن عبیدالله کپتانزاده د پنجشنبې ورځې له غرمې وروسته، د میزان په ۲مه نېټه، د ولسوالۍ په «اکتبین» سیمه کې په ډزو وویشتل شو او د سختو ټپونو له امله یې خپل ژوند له لاسه ورکړ.
د سرچینو په وینا، کپتانزاده د سر له ناحیې ټپي شوی و او له روغتون ته تر انتقال وروسته، بله ورځ د خپلو ټپونو له امله مړ شو.
تر اوسه د بریدګرو د هویت، د ډزو د انګېزې او د پېښې د څرنګوالي په اړه نور معلومات نه دي ترلاسه شوي. په نورستان کې د طالبانو ځايي چارواکو هم د دې پېښې په اړه څه نه دي ویلي.
دا پېښه په داسې حال کې رامنځته شوې چې په وروستیو کلونو کې د افغانستان په یو شمېر ولایتونو کې د نامعلومو وسلهوالو له خوا د خلکو د وژل کېدو پېښې راپور شوي دي؛ خو په ټول هېواد کې د دغو پېښو د کچې په اړه جامع او د پرتله کولو وړ احصائیې شتون نه لري.
د ملګرو ملتونو په راپورونو کې هم په تېر وخت کې د ژوند د حق د دوامدارو سرغړونو، چې پکې د پخواني حکومت او پخوانیو امنیتي ځواکونو له غړو سره تړلو کسانو وژنې هم شاملې دي، اندېښنه څرګنده شوې او د څېړنې، د عاملانو د پېژندنې او حسابورکونې پر اړتیا ټینګار شوی دی.
د دې پېښې د عاملانو په اړه د معلوماتو د نشتوالي له امله، په اوس وخت کې د کپتانزاده وژنه کوم ځانګړي کس یا ډلې ته منسوبول ممکن نه دي.
لیکواله:رویا ستانکزی
