د قندهار د رسنیو او معلوماتو مرکز اعلان کړی دی چې د طالبانو د حکومت د رهبر هبتالله اخندزاده د فرمان پر بنسټ، فدامحمد نظامي د قندهار د دویمې حوزې په احمدشاه بابا نړیوال هوايي ډګر کې د نوي رئیس په توګه ټاکل شوی دی. د دې مرکز د معلوماتو له مخې، هغه وروسته له دې چې د معرفي کولو مراسم یې تر سره شول، په رسمي توګه خپل کار پیل کړی دی.
دا مراسم د شنبې په ورځ د ځینو محلي چارواکو په ګډون تر سره شول. په دې پروګرام کې، میرزا محمد زاهد د «رهبرۍ اطاعت» پر اهمیت ټینګار وکړ او اداري بدلونونه یې د مدیریت د یوه طبیعي بهیر برخه وبلل. همداراز جمالالدین مبرور هم په دې مراسمو کې ګډون کړی و او له کارمندانو څخه یې غوښتنه کړې چې له نوي رئیس سره بشپړه همکاري وکړي.
احمدشاه بابا نړیوال هوايي ډګر د قندهار په جنوب کې د هېواد یو له مهمو ترانسپورټي مرکزونو څخه ګڼل کېږي. په تېرو کلونو کې، د مهمو چارواکو د ټاکلو طریقه چې د مستقیم فرمان له لارې ترسره کېږي، تل د اداري بهیر د شفافیت او پریکړو کې د ګډون په اړه بحثونه راپارولي دي.
لیکواله: سلیمه آریایي
