د شنبې په سهار د اندونیزیا د فلوریس ټاپو د ۷.۷ درجې زورورې زلزلې ولړزاوه. د لومړنیو راپورونو له مخې، په دې پېښه کې لږ تر لږه ۳۸ کسان وژل شوي دي. د لټون او ژغورنې عملیات لا هم روان دي او سیمهییزو چارواکو ویلي چې ښايي د قربانیانو شمېر نور هم زیات شي. یو شمېر ټپیان هم د بېلابېلو کچو ټپونو له امله روغتیايي مرکزونو ته انتقال شوي دي.
دغه زلزله د سیمهییز وخت له مخې د سهار له پنځو بجو لږ مخکې رامنځته شوه. د اندونیزیا د هوا پېژندنې او جیو فزیک ادارې ویلي چې د زلزلې مرکز د ځمکې په شاوخوا ۱۵ کیلومترۍ ژوروالي کې و. له اصلي زلزلې وروسته په سیمه کې لسګونه پسلړزې هم ثبت شوي چې ځینو یې د پام وړ شدت درلود. د یوې پسلړزې شدت ۶.۱ درجې ته رسېدلی دی.
راپورونه ښيي چې د ټاپو په بېلابېلو برخو کې یو شمېر ودانیو ته زیانونه اوښتي دي. په لرې پرته او غرنیزه سیمه تالیبورا کې د زیانونو د بشپړې کچې ارزونه لا هم روانه ده. د لومړنیو معلوماتو له مخې، په دې سیمه کې ۵۴ کورونه، پنځه روغتیايي مرکزونه، درې عبادتځایونه، شپږ دولتي ودانۍ، یو ښوونیز مرکز او یو ګودام سخت زیانمن شوي دي.
د اندونیزیا چارواکو ویلي چې د مانګارای ولایت هم د دغې زلزلې له امله له تر ټولو زیانمنو سیمو څخه دی. د ختیځې نوسا ټینګارا ولایت والي، امانوئل ملکیادس لاکا لانا، ویلي چې ځینې قربانیان د خوب پر مهال د ودانیو د نړېدو او د خاورو د راپرېوتو له امله وژل شوي دي.
له مائومرې بندر څخه خپرو شویو انځورونو کې لیدل کېږي چې د ترمینل د ودانۍ د کانکریټ ځینې برخې نړېدلي او د مسافرو د شتون پر مهال پرې راپرېوتي دي. په نورو انځورونو کې ښکاري چې د بېړۍ د متحرک پله له نړېدو سره یو شمېر کسان اوبو ته لوېدلي دي. په بېلابېلو سیمو کې د هغو کسانو د موندلو او ژغورلو عملیات دوام لري چې ښايي تر خاورو لاندې بند پاتې یا ټپیان شوي وي.
له زلزلې وروسته د ساحلي سیمو لپاره د سونامي خبرداری هم ورکړل شوی. دغه خبرداری شاوخوا درې ساعته وروسته له هغه لغوه شو چې د سمندر د اوبو په سطحه کې د پام وړ لوړوالی ونه لیدل شو. د خبرداري له خپرېدو وروسته داسې انځورونه هم خپاره شول چې خلک په ډلهییزه توګه پر موټرسایکلونو د ټاپو د دننیو سیمو پر لور روان دي.
د اندونیزیا د طبیعي پېښو د مدیریت ملي ادارې ویلي چې شاوخوا ۲ زره کسانو په خپله خوښه خپلې مېنې پرېښې یا خوندي سیمو ته انتقال شوي دي. دغې ادارې له خلکو غوښتي چې خپل ارام وساتي او له ساحلي سیمو او هغو ودانیو څخه لرې پاتې شي چې د زیان نښې پکې لیدل کېږي.
د زیانمنو سیمو د غرني او لرې پرتو موقعیت له امله، سیمهییزو چارواکو ویلي چې د زیانونو د بشپړې کچې ارزونه ښايي وخت ونیسي. د ژغورنې ډلې د زیانمنو سیمو ارزونه کوي او هڅه کوي هغو ځایونو ته لاسرسی ومومي چې ښايي خلک پکې بند پاتې وي.
اندونیزیا په هغه سیمه کې موقعیت لري چې د درېیو لویو ټکتونیکي تختو د یوځای کېدو سیمه ده، له همدې امله د نړۍ له زلزلهځپلو هېوادونو څخه شمېرل کېږي. دغه هېواد پراخ اورغورځوونکي فعالیتونه هم لري او په تېرو کلونو کې یې څو ځله د سختو زلزلو او سونامي شاهد پاتې شوی دی.
لیکواله:سلیمه آریایي
