د طالبانو د بدخشان والي مولوي محمداسماعیل غزنوي د طالبانو مخالفانو ته خبرداری ورکړی چې د اسلامي نظام او افغانستان د بېثباته کولو خوبونه به له ځان سره «قبر ته» یوسي.
غزنوي دا څرګندونې د طالبانو د بیا واکمنېدو د ورځې په مناسبت جوړې شوې مشاعرې او غونډې ته کړي دي.
نوموړي ویلي: «دښمنانو ته په ډاګه وایم، چې تاسې که د اسلامي نظام او یا د افغانستان د خطې د اخلال خوبونه وینئ، دا خوبونه به انشاءالله تاسې قبر ته له ځان سره وړئ.»
د طالبانو د بدخشان د والي څرګندونې داسې مهال دي چې په دې ولایت کې په وروستیو کې د طالبانو پر ضد د وسلهوالو ډلو بریدونه زیات شوي دي.
د راپورونو له مخې، د طالبانو مخالفې وسلهوالې ډلې، په ځانګړي ډول د ازادۍ جبهې، په زېباک او د سپاهیان میهن ډلې په یفتل پایين کې خپل بریدونه زیات کړي دي. په همدې مهال، متحدې جبهې هم د افغانستان په جنوب او نورو سیمو کې د طالبانو پر ضد غلچکي بریدونه پیل کړي دي.
دغه بریدونه د طالبانو د واکمنۍ د پنځم کال د نمانځلو له ترتیباتو سره هم مهاله شوي دي.
لیکوال:سعید سمیر
