د افغانستان د نجونو لپاره د تعلیمي بندیزونو په دوام کې، د انلاین زدهکړو پراختیا د یوه بدیل په توګه د ډیرو ادارو او زدهکوونکو پام ځان ته اړولی دی. په داسې حال کې چې له شپږم ټولګي نه پورته د نجونو لپاره د مکتبونو دروازې لا هم تړلې پاتې دي، ډیجیټالي پلاټفرمونه هڅه کوي چې په تعلیمي نظام کې شته خلا تر یوې کچې پوره کړي.
یو له دې ابتکاري پروګرامونو څخه، د “سولهایکس” تعلیمي پلاټفرم دی چې د برابرې زدهکړې لاسرسي لپاره، په ځانګړې توګه د نجونو لپاره، خپل درسي پروګرامونه پراخ کړي دي. دغه پلاټفرم په وروستیو کې د لسم او یولسمو ټولګیو لپاره د ساینس مضامین وړیا په ډول د لاسرسي وړ کړي دي، تر څو د زدهکړو د دوام زمینه برابر شي.
د دې پروګرام مسؤلینو ویلي دي چې تر اوسه پورې له ۳۵ زرو څخه زیات زدهکوونکي په دې پلاټفرم کې راجستر شوي دي. دغه شمېر د انلاین زدهکړو لپاره پراخ ملاتړ او په اوسني وضعیت کې د تعلیمي بدیلونو پر اړتیا د جدي اړتیا ښکارندویي کوي. د دوی په وینا، د دې پروګرام یوه لویه برخه هغه نجونې جوړوي چې د شته بندیزونو له کبله له حضوري زدهکړو څخه محرومې پاتې دي.
تعلیمي کارپوهان باور لري چې انلاین زدهکړې کولی شي په لنډه موده کې د تعلیمي اړتیاو ځینې برخې پوره کړي، خو لا هم ځینې ننګونې لکه د انټرنټ محدود لاسرسی، د تخنیکي وسایلو نشتوالی، او د زدهکړې د کیفیت توپیرونه، د دې لارې په وړاندې مهم خنډونه دي. سره له دې، د داسې پروګرامونو پراختیا کولی شي نوي فرصتونه د زدهکړو لپاره برابر کړي.
په ټوله کې، په انلاین تعلیمي پلاټفرمونو کې د راجستر شوو زدهکوونکو زیاتوالی ښيي چې د زدهکړې دوام ته په ځانګړې توګه د نجونو تر منځ لوړې غوښتنې شتون لري. دا به د تعلیمي پیوستون ساتلو او د زدهکوونکو د زدهکړو له پرمختګ سره د فاصلو د رامنځته کېدو مخنیوي لپاره مهم رول ولري، که څه هم د دې برخې لپاره د اوږدمهاله او ټولشموله حل لارو اړتیا شته.
لیکواله:سلیمه آریایی
