په پنجشېر کې سیمهییزې سرچینې وايي، د یوې کورنۍ څلور ماشومان، چې دوه نجونې او دوه هلکان دي، د دغه ولایت د رُخې ولسوالۍ په یوه سیمه کې د ماین د چاودنې له امله سخت ټپیان شوي دي.
د سرچینو په وینا، دا پېښه تېره ورځ د رُخې ولسوالۍ په یوه سیمه کې رامنځته شوې ده. ماشومان د ابو د یوه ډنډ شاوخوا د لوبو پر مهال له ماین سره مخ شوي او د هغه له چاودنې وروسته ټول څلور ماشومان ټپیان شوي دي.
سیمهییزې سرچینې زیاتوي چې د دغو ماشومانو له ډلې د یوې نجلۍ او یوه هلک روغتیايي وضعیت د اندېښنې وړ دی او کابل ته د لا ډېرو درملنې او طبي پاملرنې لپاره لېږدول شوي دي.
ځايي اوسېدونکي وايي، دغه ماین د ابو د ډنډ ترڅنګ د وسلهوالو کسانو له لوري ځای پر ځای شوی و. سیمهییزو سرچینو طالبان د دغه ماین د ځای پر ځای کولو مسوول بللي؛ خو دا ادعا تر اوسه په خپلواکه توګه نه ده تایید شوې.
پنجشېر په تېرو دوو لسیزو کې د افغانستان له نسبتاً خوندي ولایتونو څخه ګڼل کېده، خو په ۲۰۲۱ کال کې واک ته د طالبانو له بیا رسېدو وروسته، دغه ولایت د وسلهوالو نښتو او پراخو پوځي عملیاتو شاهد پاتې شوی دی.
طالبانو په ۲۰۲۱ کال کې له خپلو مخالفو ځواکونو سره له نښتو وروسته د پنجشېر کنټرول ترلاسه کړ. له هغه وخت راهیسې د دغه ولایت د اوسېدونکو د نیولو، ناوړه چلند او فشار اچولو په اړه راپورونه خپاره شوي دي.
دا پېښه په داسې حال کې رامنځته شوې چې د افغانستان په ځینو برخو کې د ماینونو، ناچاودو مهماتو او نورو پاتې چاودېدونکو توکو شتون لا هم د ملکي وګړو، په ځانګړي ډول د ماشومانو، ژوند ګواښي.
ماشومان د ماینونو او له جګړو څخه د پاتې ناچاودو مهماتو له خطرونو څخه د ناپوهۍ له امله د دا ډول پېښو پر وړاندې له تر ټولو زیانمنونکو ډلو څخه دي او هر کال یو شمېر یې د دغو توکو له امله خپل ژوند له لاسه ورکوي یا ټپیان کېږي.
لیکواله:سلیمه آریایي
