اېف بي ای د محمودشاه حبیبي د ورکېدو په څلورمه کلیزه کې: د هغه د بېرته راوستلو لپاره ژمن یو.
د امریکا فدرالي تحقیقاتو ادارې (اېف بي ای) د افغانستاني-امریکايي وګړي محمودشاه حبیبي د ورکېدو د څلورمې کلیزې په مناسبت ویلي چې لا هم د هغه د موندلو او خپلې کورنۍ ته د بېرته سپارلو لپاره هڅې کوي. دې ادارې له هغو کسانو هم غوښتي چې د حبیبي د ساتل کېدو د ځای په اړه معلومات لري، له اېف بي ای سره یې شریک کړي.
محمودشاه حبیبي د ۲۰۲۲ کال د اګست په ۱۰مه د کابل په ښار کې خپل کور ته څېرمه ورک شو. د اېف بي ای د اعلامیې له مخې، هغه د ورکېدو پر مهال په کابل کې د مېشتې مخابراتي کمپنۍ «Asia Consultancy Group» د سلاکار په توګه دنده ترسره کوله. نوموړي تر دې مخکې د افغانستان د ملکي هوايي چلند ادارې د مشر په توګه هم دنده ترسره کړې وه.
اېف بي ای ویلي چې د حبیبي د ورکېدو په ورځ د طالبانو استخباراتو هغه او د هغه موټرچلوونکی له موټر څخه ونیول. د دې ادارې په وینا، حبیبي او موټرچلوونکی یې د «Asia Consultancy Group» له ۲۹ نورو کارکوونکو سره یوځای نیول شوي وو، خو له هغه وخت راهیسې د هغه د برخلیک او د ساتل کېدو د ځای په اړه هېڅ معلومات نه دي خپاره شوي.
په واشنګټن کې د FBI د ترهګرۍ ضد څانګې مسوول ځانګړي استازي مایکل بورګوالډ ویلي چې دا اداره لا هم ژمنه ده چې محمودشاه حبیبي خپلو عزیزانو ته بېرته ورسوي. هغه د حبیبي د لور یادونه هم کړې چې د خپلې لومړۍ کلیزې له رارسېدو مخکې یې خپل پلار وروستی ځل لیدلی و او له هغه وخت راهیسې یې پلار نه دی لیدلی.
بورګوالډ له هغو کسانو چې د حبیبي د ساتل کېدو د ځای په اړه معلومات لري، غوښتي چې له FBI سره اړیکه ونیسي. هغه ټینګار کړی چې د معلوماتو شریکول کولای شي د تحقیقاتو له پرمختګ سره مرسته وکړي او د حبیبي د بېرته خپلې کورنۍ ته ستنېدو زمینه برابره کړي.
په همدې حال کې، FBI په ۲۰۲۵ کال کې د محمودشاه حبیبي د ورکېدو په اړه د خپلو تحقیقاتو په لړ کې د هغه د لټون پوسټر هم خپور کړ. دې ادارې یو ځل بیا له خلکو غوښتي چې د هغه د قضیې په اړه هر ډول اړوند معلومات له مسوولو چارواکو سره شریک کړي.
د امریکا د بهرنیو چارو وزارت د «عدالت لپاره د انعام» (Rewards for Justice) پروګرام هم د هغو معلوماتو لپاره چې د محمودشاه حبیبي د موندلو، ژغورلو او بېرته راوستلو لامل شي، تر ۵ میلیونه امریکايي ډالرو پورې د انعام اعلان کړی دی.
د هغه د ورکېدو له څلورو کلونو تېرېدو سره سره، د محمودشاه حبیبي برخلیک او د هغه د ساتل کېدو ځای لا هم روښانه نه دی.
لیکواله:سلیمه آریایي
