طاوس، چې د دايکندي ولايت يوه ۲۶ کلنه واده شوې ښځه ده، وايي يو سړی د «طالبانو په ملاتړ» غواړي هغه دويم واده ته اړ کړي او په زور يې په نکاح کړي. نوموړې وايي، د طالبانو له خوا د نيول کېدو او جبري دويم واده له وېرې، اوس په پټه ژوند کوي.
د هغې په وينا، په ۱۳۹۹ کال کې کوژده شوې وه او د ۱۴۰۴ کال د تلې په مياشت کې يې واده وکړ، خو د واده څو مياشتې وروسته يو وسلهوال پښتون سړی د دوی کور ته ورغی او ادعا يې وکړه چې ګواکې د هغې مېړه دی.
طاوس وايي، وروسته له هغې چې ياد سړي د طالبانو محکمې ته شکايت وکړ، د دايکندي د اشترلي ولسوالۍ طالب محکمو د هغې خپلوان ونيول.
د معلوماتو له مخې، د اشترلي ولسوالۍ د طالبانو امنيه قوماندانۍ د هغې پلار د وري له ۱۳مې د غویي تر اوومې نېټې پورې ۲۴ ورځې بندي کړی و. همداراز د هغې د مېړه ورور د غویي له اوومې تر شلمې نېټې ۱۴ ورځې او د هغې خسر څلور ورځې په بند کې ساتل شوي وو.
مولوي الهام، چې د طالبانو د اشترلې ولسوالۍ قاضي دی، له يوې سيمهييزې رسنۍ سره په مرکه کې د دغو کسانو د نيول کېدو پخلی کړی دی.
طاوس وايي، طالبانو د چهارشنبې په ورځ د غویي په ۲۳مه د سيمهييزو مشرانو په ضمانت د هغې خسر له زندانه خوشې کړی، خو لا هم د هغې او کورنۍ اندېښنې پر ځای دي او د احتمالي جبري واده له وېرې په پټه ژوند کوي.
لیکوال:سعید سمیر
