د ننګرهار د طالبانو امنیه قوماندانۍ وایي، په کوز کونړ ولسوالۍ کې یې یوه ښځه چې شاوخوا اته میاشتې په یوه تیاره کوټه کې بنده ساتل شوې وه، ژغورلې ده.
د طالبانو د امنیې قوماندانۍ ویاند سید طیب حماد د شنبې په ورځ، د زمري په ۱۷مه، ویلي چې دغه ښځه د کوز کونړ ولسوالۍ د تارانو کلي له یوه کور څخه د عملیاتو پر مهال ژغورل شوې ده.
د نوموړي په وینا، د پېښې په تړاو یو کس هم نیول شوی او د لومړنیو څېړنو پر مهال یې پر خپل جرم اعتراف کړی دی.
طالبانو د دې پېښې د څرنګوالي او د ښځې د اته میاشتني بند د لامل په اړه نور جزئیات نه دي ورکړي.
دا په داسې حال کې ده چې تر دې وړاندې هم په یو شمېر ولایتونو کې د کورني تاوتریخوالي او د ښځو د بند ساتلو په تړاو د ورته پېښو د مخنیوي خبرونه ورکړل شوي دي.
لیکوال:سعید سمیر
