د خوراک او کرنې نړیوال سازمان فائو اعلان کړی چې په ۲۰۲۴ او ۲۰۲۵ کلونو کې یې په افغانستان کې د «کوچني څارویو طاعون» ناروغۍ پر ضد د ۹ میلیونه څخه زیات څاروي واکسین کړي دي. دا اقدام د دې ناروغۍ د کنټرول او مهارولو په لړ کې د پراخو هڅو یوه برخه بلل شوې ده.فائو د یکشنبې په ورځ، د غویي۱۳ مه په یوه پیغام کې ټینګار کړی چې له دې ناروغۍ سره د مبارزې بهیر دې مرحلې ته رسېدلی چې افغانستان د هغې له منځه وړلو ته نږدې دی. د دې سازمان په وینا، دا لاسته راوړنه د همغږو پروګرامونو او د څارویو په برخه کې د مخنیوي اقداماتو نتیجه ده.
د فائو د اعلان له مخې، د کوچني څارویو طاعون په تېرو کلونو کې د څارویو او د کلیوالو د ژوندیو سرچینو لپاره یو جدي ګواښ و. دغه ویروسي ناروغي عمدتاً پسه او وزې په نښه کوي او د څارویو پالونکو ته د پام وړ اقتصادي زیانونه اړوي.
دې سازمان زیاته کړې چې د پراخ واکسینیشن پروګرام پر وړاندې د عمل دنده مهم رول لوبولی او د کلیوالو د عایداتو د ساتنې او د هغوی د خوراکي توکو په تامینولو کې مرسته کړې ده. د څارویو د مړینې کموالی کولی شي د څارویو پالونکو ټولنو اقتصادي وضعیت ته وده ورکړي.
فائو همدارنګه خبرداری ورکړی دی چې که چېرې دا ناروغي پراخه شي، ښایي تر ۷۰٪ پورې څاروي په دې ناروغۍ اغیزمن شي. له دې امله، د مخنیوي او څارنې د دوامداره اقداماتو ترسره کول د ناروغۍ د بیا خپرېدو د مخنیوي لپاره ضروري بلل شوي دي.
دا په داسې حال کې ده چې په افغانستان کې څارویو پالونکي په تېرو کلونو کې د وچکالۍ په څېر له ګڼو ننګونو سره مخ شوي دي. دا ډول شرایط د څارویو د پالنې په برخه کې د ملاتړ او د دامي ناروغیو د کنټرول اهمیت زیاتوي.
لیکواله:سلیمه آریایي
