د ایران د روغتیا وزارت اعلان کړی چې د امریکا له لوري د منسوبو بریدونو له امله د تېرو درېیو اونیو په ترڅ کې لږ تر لږه ۵۰ کسان وژل شوي او له ۵۰۰ څخه زیات نور ټپیان شوي دي. د دې وزارت په وینا، د قربانیانو په منځ کې ښځې او ماشومان هم شامل دي.
د ایران د روغتیا وزارت ویاند، حسین کرمانپور، د شنبې په ورځ د چنګاښ په ۲۷مه د یوې خبرپاڼې په خپرولو سره وویل چې ثبت شوې شمېرې د چنګاښ له ۶مې تر ۲۷مې پورې اړه لري. د نوموړي په وینا، په دې موده کې ۵۰ کسان وژل شوي او له ۵۰۰ څخه ډېر نور ټپیان شوي دي.
کرمانپور ویلي چې د وژل شویو په منځ کې ۵ ښځې او ۲ ماشومان شامل دي. همداراز، د ټپیانو په منځ کې ۳۲ ښځې او ۱۸ تنکي ځوانان هم ثبت شوي دي. هغه زیاته کړه چې د ۳۷ ټپیانو روغتیايي وضعیت لا هم نازک دی او دوی لا هم په روغتونونو کې بستر دي.
بل لور ته، امریکايي چارواکو ویلي چې تر اوسه د وروستیو بریدونو په ترڅ کې د امریکا هېڅ پوځي ځواک نه دی وژل شوی او نه هم ټپي شوی دی.
پرون د ایران سپاه پاسداران ادعا وکړه چې د سوریې په التنف کې یې د امریکا پر پوځي اډه په برید کې ګڼ شمېر امریکايي پوځیان وژلي یا ټپیان کړي دي. خو د امریکا د پوځ مرکزي قوماندانۍ (سینټکام) د یوې خبرپاڼې په خپرولو سره دا ادعا رد کړې.
په همدې حال کې، د سيبياېس خبري شبکې نن سهار راپور ورکړ چې د اردن په الازرق پوځي اډه د ایران په برید کې څو امریکايي پوځیان ټپیان شوي دي. تر اوسه امریکايي چارواکو د دې راپور په اړه نور جزئیات نه دي ورکړي.
د ایران او امریکا ترمنځ د نښتو نوی پړاو د تېرې اونۍ د یکشنبې په ورځ پیل شو او نن یې اوومه پرلهپسې ورځ ده. هممهاله، د دواړو هېوادونو ترمنځ سیاسي او پوځي کړکېچ لا هم د زیاتېدو په حال کې دی.
د امریکا ولسمشر ډونالډ ټرمپ مخکې ویلي وو: «تفاهملیک یوازې یو سند دی، او هر وخت چې وغواړم، بیا به بمبارۍ پیل کړم.» په مقابل کې، ایراني چارواکو ویلي چې دغه تړون، چې د اوربند او جګړو د درېدو لامل شوی و، نور اعتبار نه لري.
د ایران د بهرنیو چارو وزارت مرستیال، کاظم غریبآبادي، نن اعلان وکړ چې تهران د اسلامآباد د تفاهملیک په چوکاټ کې د خپلو ټولو ژمنو عملي کول درولي دي. د هغه په وینا، دا پرېکړه وروسته له هغې وشوه چې امریکا د خپلو کړنو له لارې د دغه تفاهملیک ټولې ژمنې تر پښو لاندې کړي.
لیکواله:سلیمه آریایي
