د پاکستان پولیسو په لاهور ښار کې د تلاشۍ د عملیاتو پر مهال، ۱۲۱ تنه افغان وګړي نیولي دي.
پاکستاني رسنیو د شنبې په ورځ (د چنګاښ ۲۷مه) راپور ورکړی چې د نیول شویو کسانو د اسنادو له څېړلو وروسته، ۲۸ تنه افغان وګړي چې د استوګنې قانوني اسناد یې لرل، بېرته خوشې شوي دي.
د دغه راپور له مخې، ۹۳ تنه افغان وګړي چې د استوګنې قانوني اسناد یې نه لرل، د قانوني پړاوونو د تېرولو لپاره په لاهور ښار کې د ساتنې یوه مرکز ته لېږدول شوي دي.
دا پېښه په داسې حال کې رامنځته کېږي چې په وروستیو میاشتو کې، د طالبانو او پاکستان ترمنځ د کړکېچونو له دوام سره هم مهاله، له پاکستان څخه د افغان کډوالو د نیولو، شړلو او بېرته ستنولو لړۍ ګړندۍ شوې ده.
د بشري حقونو بنسټونو تر دې وړاندې په ځینو هېوادونو، لکه پاکستان او ایران کې له افغان کډوالو سره پر تاوتریخوالي ډک چلند باندې اندېښنه ښودلې وه او د هغوی د انساني حقونو او کرامت د درناوي غوښتنه یې کړې وه.
په ورته وخت کې، طالبانو اعلان کړی چې پرون ۳ زره ۷۵۳ کسان د بېلابېلو سرحدي تګلارو (بندرونو) له لارې افغانستان ته داخل شوي دي. د دغې ډلې د معلوماتو له مخې، دا کسان له ګاونډیو هېوادونو څخه تر راستانه کېدو وروسته افغانستان ته لېږدول شوي دي.
لیکواله:سلیمه آریایي
