د کابل د طالبانو د ښاروال د تازه انځورونو خپرېدل؛ د زیربنايي پروژو لیدنه د نیولو د راپورونو له خپرېدو وروسته
د کابل د طالبانو د ښاروال، عبدالرشید، تازه انځورونه خپاره شوي چې هغه د څو زیربنايي پروژو د لیدنې پر مهال ښيي. د دې انځورونو خپرېدل په داسې حال کې شوي چې تر دې وړاندې په ځینو رسنیو او ټولنیزو شبکو کې د هغه د احتمالي نیول کېدو په اړه د فساد د تورونو راپورونه خپاره شوي وو.
د خپرو شویو انځورونو له مخې، عبدالرشید د کابل ـ لوګر د سړک پروژې د تطبیق له بهیر څخه لیدنه کړې او د دې پروژې د کار د پرمختګ په اړه یې معلومات ترلاسه کړي دي. د طالبانو چارواکو تر اوسه د هغه د احتمالي نیول کېدو د راپورونو په اړه کوم رسمي او روښانه څرګندونې نه دي کړي.
په وروستیو اونیو کې ځینو رسنیو او د ټولنیزو شبکو کاروونکو ادعا کړې وه چې د کابل د طالبانو ښاروال د فساد په تور نیول شوی دی. خو تر اوسه د طالبانو د اړوندو ادارو له لوري په دې اړه هېڅ رسمي سند یا تایید نه دی خپور شوی.
منتقدان وايي چې د طالبانو رسمي ادارې عموماً د داخلي اختلافاتو یا د احتمالي فساد د قضیو په اړه شفاف او منظم معلومات نه خپروي. د دوی په وینا، همدا موضوع د عامه افکارو ترمنځ د ابهام او ګمانونو د زیاتېدو لامل ګرځي.
لیکواله:سلیمه آریایي
