د افغانستان د ملي مقاومت جبهې اعلان کړی چې د کابل ښار د یولسمې حوزې اړوند د قلعه نجارها په سیمه کې د غویي ۱۱ مې د چاودنې مسوولیت پر غاړه لري. دغې جبهې په یوه خبرپاڼه کې چې دوشنبې، د غویي ۱۴ مه خپره شوې، ویلي چې دغه عملیات د دې جبهې اړوند ځواکونو له خوا ترسره شوي دي.
په دې خبرپاڼه کې راغلي چې په دې پېښه کې دوه د طالبانو اړوند جنګیالي ټپیان شوي دي. همدارنګه ټینګار شوی چې ملکي وګړو او د جبهې ځواکونو ته زیان نه دی رسېدلی.
مخکې له دې، ځايي سرچینو هم په همدې سیمه کې د دوو چاودنو د رامنځته کېدو تائید کړی و. خو د دې پېښو د څرنګوالي په اړه نور جزئیات په خپلواکه توګه نه دي تایید شوي.
په پلازمېنه کې د ورته هدفي پېښو زیاتوالی د کابل اوسيدونکو اندیښنې د ښار د امنیت وضعیت او د طالبانو د ښار د امنیت د ساتلو وړتیا په اړه زیاتې کړې دي.
لیکواله:سلیمه آریایي
