سرګي شویګو، د روسیې د ملي امنیت د شورا سکرتر ویلي چې دغه هېواد د طالبانو سره د «بشپړ مشارکت» د جوړولو په حال کې دی او نور سیمیز هېوادونه هم هڅوي چې له دې ډلې سره خپلې همکارۍ پراخې کړي.
د رویټرز د راپور له مخې، د روسیې د ملي امنیت سکرتر دا څرګندونې (پنجشنبې، د غويي ۲۴مه) د شینګهای همکارۍ سازمان د غړو هېوادونو د خپلو سیالانو سره په یوه غونډه کې کړي دي.
سرګي شویګو ویلي چې له طالبانو سره همکاري د سیمې د امنیت او پرمختګ لپاره مهمه ده او روسیه له دې ډلې سره د «عملي خبرو» ترڅ کې ده، چې پکې د امنیت، سوداګرۍ، کلتور او بشري مرستو برخې شاملې دي.
د روسیې د ملي امنیت سکرتر همدارنګه د شینګهای همکارۍ سازمان څخه غوښتنه کړې چې د افغانستان لپاره د اړیکې ډله بیا فعاله کړي.
روسیې په تېرو څلورو کلونو کې له طالبانو سره پراخ سیاسي او اقتصادي تعاملات درلودلي دي او اوس مهال یوازینی هېواد دی چې د دې ډلې حکومت په افغانستان کې په رسمیت پېژندلی دی.
د روسیې حکومت په ۲۰۰۳ کال کې طالبان د «غیر قانوني او ترهګرې ډلې» په توګه اعلان کړي و، خو د ۲۰۲۵ په اپرېل کې یې نوم د خپلو ترهګرو ډلو له فهرسته وباسه او وروسته یې د طالبانو حکومت په افغانستان کې په رسمیت وپېژانده.
خو د روسیې چارواکو څو ځله په افغانستان کې د ترهګرو ډلو د شتون په اړه اندېښنې څرګندې کړي او له طالبانو یې غوښتنه کړې چې له ټولو ترهګرو ډلو سره یو شان چلند وکړي.
لیکواله:سلیمه حکیمي
