په ډېرې خواشینۍ سره، د افغانستان د ملي کرکټ پخوانی ستوری او د دې لوبې له تلپاتې څېرو څخه یو، شاپور ځدراڼ، له څو میاشتو ناروغۍ وروسته وفات شو. د هغه مړینه د افغانستان د ورزش او د کرکټ د ټولنې لپاره یوه ستره ضایعه بلل کېږي.
شاپور زدران په وروستیو میاشتو کې په یوې نادرې او خطرناکې ناروغۍ «هموفاګوسایټيک لیمفوهیستیوسایتوسس» اخته شوی و؛ هغه ناروغي چې د بدن د معافیتي سیستم فعالیت په جدي ډول ګډوډوي. نوموړي د تېر کال له وروستیو راهیسې له روغتیايي ستونزو سره مبارزه کوله او د جنوري په میاشت کې د درملنې د دوام لپاره نوي ډیلي، هند ته ولېږدول شو.
سره له دې چې ډاکټرانو پراخې هڅې وکړې او هغه څو ځله د جدي پاملرنې څانګې تر ساتنې لاندې وو، خو روغتیايي حالت یې ورو ورو خراب شو. سختو انتاناتو، نري رنځ او وروسته د ډینګي تبې د هغه د درملنې بهیر لا ستونزمن کړ.
شاپور ځدراڼ د ۱۹۸۷ کال د جولای په ۸مه په لوګر ولایت کې زېږېدلی و. هغه د خپلې کورنۍ د کډوالۍ پر مهال په پېښور، پاکستان کې له کرکټ سره اشنا شو او وروسته د افغانستان د کرکټ د زرین نسل له لومړنیو ستورو څخه وګرځېد.
هغه له یوې لسیزې ډېر وخت د افغانستان د ملي کرکټ لوبډلې لپاره ولوبېد او د ۲۰۰۹ او ۲۰۲۰ کلونو ترمنځ یې په شاوخوا ۸۰ نړیوالو سیالیو کې د افغانستان استازیتوب وکړ. ځدراڼ د چپ لاس تېز توپ اچونې، لوړ قد او جنګي روحیې له امله د افغانستان د کرکټ د تاریخي پرمختګ او نړیوالې کچې ته د رسېدو په بهیر کې مهم رول درلود.
شاپور ځدراڼ په درېیو شل اوریزو نړیوالو جامونو کې ګډون کړی و او د ۲۰۱۵ کال د نړیوال جام د افغانستان د لوبډلې غړی هم و. په همدې سیالیو کې افغانستان د نړیوال جام په تاریخ کې خپله لومړنۍ بریا د سکاټلنډ پر وړاندې ترلاسه کړه، او ځدراڼ د وروستیو منډو په جوړولو سره د دې تاریخي بریا په بشپړېدو کې مهم رول ولوباوه.
د ناروغۍ پر مهال، د افغانستان د کرکټ ټولنې او د دې لوبې یو شمېر مشهورو څېرو د هغه ملاتړ وکړ. راشد خان، محمد نبي، اصغر افغان او د افغانستان د کرکټ بورډ مسؤلینو د هغه د لېږد او درملنې په برخه کې په هند کې مرسته وکړه او څو ځله یې له خلکو وغوښتل چې د دې ورزشکار د روغتیا لپاره دعا وکړي.
د شاپور ځدراڼ مړینه د افغانستان د کرکټ د یوه مخکښ لوبغاړي د ژوند پای دی؛ هغه ورزشکار چې په ژمنتیا، غیرت او ویاړونو سره یې د نړیوالې کچې په ډګر کې د افغانستان د نوم په لوړولو کې ستره ونډه لرله او د میلیونونو کرکټ مینه والو لپاره یې نه هېرېدونکي خاطرې پرېښودې.
لیکواله:سلیمه آریایي
